Azken 40 urteetako euriterik handienak kalte larriak eragin ditu errefuxiatu sahararren kanpamenduetan. Abenduaren 20ra bitartean diru bilketa egingo dute Goierriko Sahararen LagunekKanpamenduak hankaz gora, etxeak, eskolak eta osasun zentroak botata, ...
Azken 40 urteetako euriterik handienak kalte larriak eragin ditu errefuxiatu sahararren kanpamenduetan. Abenduaren 20ra bitartean diru bilketa egingo dute Goierriko Sahararen Lagunek
Saharako haurrak Goierriko familiekin elkartzen, udan.
Kanpamenduak hankaz gora, etxeak, eskolak eta osasun zentroak botata, jatekorik eta mantarik gabe… Duela bi aste Tindoufeko errefuxiatu kanpamenduetan izandako uholdeak egoera larrian utzi ditu bertan bizi diren familia sahararrak. Egoera horri aurre egiteko, diru bilketa egitea erabaki dute Goierriko Sahararen Lagunek. Abenduaren 20ra arte jasoko dituzte ekarpenak; diru hori guztia, kanpamenduak berreraikitzeko lanetara bideratuko dute.
Egoera «larria» dela azaldu du Goierriko Sahararen Lagunak elkarteko Naroa Abalabidek. «Gurera etortzen diren saharar umeen bidez dugu harremana hango jendearekin, eta haiek esanda dakigu oso gaizki daudela». Etxeak eta eskolak erorita, haimetan bizi direla aipatu du, baina askok «ez jatekorik ez mantarik» ez dutela.
Udan Saharako umeak etxean hartzen dituen Ainara Lasak ere «umeak triste» somatu dituela azaldu du, «inoiz ez bezala». Izan ere, Goierrira azken hiru urteotan uda pasatzera etorri diren ume guztiak «etxerik gabe» gelditu dira, uholdeen ondorioz. «Batzuk esan digute logelarik gabe gelditu direla, besteek ama sukalderik gabe dagoela, edo eskola ere erori egin dela. Eta horrek esan nahi du eguneroko gosaria bermatu gabe dutela». Hori guztia entzutea, harrera familientzat ere «oso gogorra» dela dio Lasak.
«Umeak triste nabaritu ditugu, eta
harrera familientzat oso gogorra da hori»
Ainara Lasa (Goierriko Sahararen Lagunak)
Egoera larria
Errefuxiatu kanpamendu bat, uholdeen ondoren.
Azken 40 urteetan ez bezalako euritea bota zuen urriaren 21ean, Saharako errefuxiatu kanpamenduak dauden desertuan. Udan Goierrira etortzen diren umeak hiru kanpamendutan bizi dira: Aaiun, Smara eta Dahla. Uholdeen eraginez hirurak «oso kaltetuta» gelditu direla eta «izugarrizko beharra» dagoela azaldu du Abalabidek.
Egoera hori ikusita, urtero egiten duten janari bilketaz gain, aurten diru bilketa ere egitea erabaki dute. «Gu Goierri mailako elkartea gara eta hemengo bilketaz arduratuko gara, baina Gipuzkoa mailan ere egiten ari dira beste bat». Abenduaren 20ra arte jasoko dituzte ekarpenak Kutxabanken zabaldu duten kontuan (2095 5030 81 1075005677). Bilketa egindakoan, diru guztia Saharar Ilargi Erdi Gorriaren esku utziko dute. Lasak azaldu duenez, «diru hori oinarrizko eraikin horiek berreraikitzera» bideratuko dute. Egoeraren «larritasuna» ikusita, laguntzak urte bukaera baino lehen bertara iristen saiatuko dira, eta bide horretan, «laguntza guztiak ongi etorriak» izango direla azaldu dute.
Goierriko Sahararen Lagunen elkarteak garbi du errefuxiatuen kanpamenduak ez direla sahararren lekua, baina momentuko egoerari konponbidea eman nahi diete. «Tamalez berreraiki beharko ez litzatekeen leku bat da, baina gutxieneko duintasun batekin bizitzeko baldintzak behar dituzte». Izan ere, «oinarrizko guztia» falta zaie.
Goierriko Sahararen Lagunek ahal duten laguntza emateko deia egin diete goierritarrei. Baina ez herritarrei bakarrik; izan ere, Goierri beheko 18 udalekin harremanetan jarri dira, eta haiei ere, laguntzaren bat emateko eskatu diete.
