Igor Alustiza 'Nikkin'-en ihesaldia
Bederatzi abestik osatzen dute Igor Alustiza 'Nikkin' musikariaren disko berria: 'Ihes'. Nondik datorren eta nora doan laburbiltzen du Nikkinek bere lehen lan luzean.
Igor Alustizak, Nikkinek, astelehenean jasoko du eskuartean bere azkeneko fruitua: Ihes diskoa. Interneten ere egun berean jarriko du entzungai Spotify, Itunes, Bandcamp… plataformetan.
Nikkinen lehenengo lan luzea da: «Hitz gutxitan esanda Ihes diskoa nire musika ibilbidean nondik natorren eta nora noan adierazten duen diskoa da. Betidanik entzun dut rock, nu metal edo industrial musika. Aldi berean Vangelis, Mike Oldfield eta Jean Michel Jarre bezalako bakarlariak txikitatik ditut gogoan. Disko hau influentzia horietatik datorren froga bat da», dio Igor Alustizak.
Bederatzi kantuz osatua dago. «Hala ere, bat edo beste elkartuta doaz, kantu bat bestearen sarrera izango balitz bezala», argitu du.
Ihes izena jarri dio diskoari. «Abestiak bukatzen ari nintzen heinean, letra denak nahigabean nire iritzi kritiko nazkatuak zirela konturatu nintzen, erremediorik gabekoak. Orduan Ihes egitea besterik ez zait gelditzen eta zoazte denak pikutara!», dio beasaindarrak irribarrez.
Euskaraz abesten du Alustizak. «Euskaraz aritzen naiz gustora. Indar handia ematen diola iruditzen zait. Gainera ez dut beste hizkuntza bat konposatzeko moduan menperatzen, ingelesa edo gaztelania adibidez. Baino nork daki»».
Epe laburrean, bi kontzertu egingo ditu Alustizak: maiatzaren 21ean Beasaingo Ertz tabernan eta San Joan jaietan, Hernaniko jaietan. «Ez ditut gehiegi jo nahi egia esan, lan handia baita bakarrean kontzertua jotzea. Baina besteren bat ere eroriko da», aitortu du beasaindarrak.
Gitarrari lotutako bizitza
Bederatzi urterekin hasi zen beasaindarra gitarra jotzen. «Lehen egunetik zur eta lur utzi zituen irakasleak gitarra baino txikiagoa zen kakanarru hark instrumentuari doinuak atera eta kantuak sortzen zuen gaitasunarekin. Igorrentzat gitarra zahar hura zen bere jostailurik maiteena eta hamahiru urterekin, bere lehen rock taldea sortu zuen gerora Goierriko musika eskeman garrantzia izan duten beste hainbat kakanarrurekin batera». Horixe dio Igor Alustiza ondo baino hobeto ezagutzen duen Mikel Alvarezek.
Ia bizitza osoan gitarra lagun izan du. Nikkineraino iritsi arte, Spurium, The Gu eta Zero taldeetan aritu izan da. «Giltzurrenetako gaixotasuna izan zuenean ere, musikan topatu zuen babesa eta motibazioa», gogoratu du Alvarezek. Nikkin sortu eta bere doinuei eta kantuei forma ematen hasi zen etxean egokitu zuen estudio txikian.
2014ko Jazpana jaialdian agertu zen eskenatoki gainean. Kontzertu hartan aurkeztutako kantuetako batzuekin eta harrezkeroztik sortutako beste batzuekin osatu du Ihes. Sound Source estudioetako Arkaitz Carrascoren laguntza izan du. Alvarezek zehaztu duenez, disko berria «bere bizia musika den talentu baten proiekturik pertsonalena da. Musikatik aldendu eta bizitzaren krudeltasunak sekula utzi behar ez zuen bidera itzuli duen talentu baten lana».
Bederatzi urterekin hasi zen beasaindarra gitarra jotzen. «Lehen egunetik zur eta lur utzi zituen irakasleak gitarra baino txikiagoa zen kakanarru hark instrumentuari doinuak atera eta kantuak sortzen zuen gaitasunarekin. Igorrentzat gitarra zahar hura zen bere jostailurik maiteena eta hamahiru urterekin, bere lehen rock taldea sortu zuen gerora Goierriko musika eskeman garrantzia izan duten beste hainbat kakanarrurekin batera». Horixe dio Igor Alustiza ondo baino hobeto ezagutzen duen Mikel Alvarezek.
Ia bizitza osoan gitarra lagun izan du. Nikkineraino iritsi arte, Spurium, The Gu eta Zero taldeetan aritu izan da. «Giltzurrenetako gaixotasuna izan zuenean ere, musikan topatu zuen babesa eta motibazioa», gogoratu du Alvarezek. Nikkin sortu eta bere doinuei eta kantuei forma ematen hasi zen etxean egokitu zuen estudio txikian.
2014ko Jazpana jaialdian agertu zen eskenatoki gainean. Kontzertu hartan aurkeztutako kantuetako batzuekin eta harrezkeroztik sortutako beste batzuekin osatu du Ihes. Sound Source estudioetako Arkaitz Carrascoren laguntza izan du. Alvarezek zehaztu duenez, disko berria «bere bizia musika den talentu baten proiekturik pertsonalena da. Musikatik aldendu eta bizitzaren krudeltasunak sekula utzi behar ez zuen bidera itzuli duen talentu baten lana».
- Informazio gehiago Nikkin-en bandcamp orrialdean.
