Cesareo De la Presari eman diote Olaria saria Legazpin, Santikutz egunean

Legazpiko bake epailea izan zen 1985etik 2006ra, eta Buztintegi elkarteko presidentea da ordutik.

Maialen Igartua

2016/05/03

Cesareo De la Presa, Olaria sariarekin, emaztearen alboan. / Arg.: Maialen Igartua

Santikutz eguna dute gaur Legazpin, jaietako egun handia. Eguerdian izan da ekitaldi nagusia. Sustraiak dantza taldeko kideek ezpata dantza egin dute, eta Aitor Martinez igo dute ezpaten gainean. Ondoren, Koldobike Olabide alkateak Olaria saria eman dio Cesareo De la Presari. Legazpiko bake epailea izan zen 1985etik 2006ra. Ordutik, Buztintegi elkarteko presidentea da. “Niretzat plazer bat da sari hau ematea, bake epaile modura ezkondu zuen lehen bikotea ni eta senarra izan ginelako”, esan du alkateak. Olaria saria jasotzea “ohorea” dela adierazi du De la Presak, eta eskerrak eman dizkie ondorengo pertsonei: emazteari, emandako babesagatik eta larunbatetan lan egin beharra ulertzeagatik; herritarrei, bake epaile zenean harengan konfiantza jartzeagatik; eta Buztintegiko zuzendaritzako kideei, laguntzagatik. Amaieran, mezu hauxe zabaldu du: “Segi taldean lanean, aurrera egiteko modu bakarra baita”. Ekitaldia amaitzeko, Sustraiak dantza taldekoek soka dantza, zinta dantza eta larrain dantza egin dituzte. Arratsaldean pilota partidak eta zaldi erakustaldia Jaiak arratsaldean jarraituko du. 17:00etan haurrentzako jolasak izango dira, Kale Nagusian. 17:30ean, berriz, profesionalen pilota partidak. Lehenengo partidan, Olaetxeak eta Imazek jokatuko dute, Mendizabal III.aren eta Tolosaren aurka. Bigarren partidan, Berasaluze II.a eta Albisu, Altuna III.aren eta Rezustaren aurka. Ormazarreta zalditegiak zaldi erakustaldia egingo du, 19:00etan. Iluntzeko zortzietan, berriz, Cantero mariatxiaren kontzertua izango da, plazan.

Azken elkarrizketak

Azken bideoak

Argitalpen bereziak