Ertzaintzak bost lagun atxilotu ditu asteburuan Ordizian eta Beasainen
Ertzaintzatik jakinarazi dutenez, atzo Ordizian lau lagun atxilotu zituzten “Ertzaintzako agenteei eraso egiteagatik”. Bere aurkako atxilotze agindu bat zuen gizonezko bat ikusi eta bera atxilotzera zihoazenean, berarekin batera zeuden sei-zazpi laguneko taldeak ertzainei “aurre egin” diela jakinarazi dute Ertzaintzatik: “Bi agenteak inguratu eta kolpatu egin dituzte, euren aurka botilak eta edalontziak botaz. Arma zuriz ere eraso egiten diete agenteei, bietako bat zauritzera iritsiz. Euren buruak arriskuan ikustean, ertzainetako batek tiro bat bota du airera erasotzaileak beldurtzeko, eta jarraian, Ertzaintzako agente gehiagoren laguntza eskatu dute biek”.Hainbat ertzain patruila gerturatu eta bere aurkako atxilotze agindua zuen gizonezkoa eta beste hiru lagun atxilotu dituzte, “agenteen aurkako atentatu eta erresistentzia delituak egotzita”. Ertzaintzak jakitera eman duenez, “erasoa jasan duten bi agenteak ospitalera eraman behar izan dituzte kolpe eta zauri ugariren ondorioz”. Senda agiria jaso dute dagoeneko. “Une honetan, Ertzaintzak ikerketa zabalik du gertakariotan parte hartu duten gainontzeko lagunak identifikatu eta atxilotzeko”.
Beasainen beste atxilotu bat
Bestalde, Beasainen, larunbat gauean Beasainen, 36 urteko gizonezko bat atxilotu zutela jakinarazi dute Ertzaintzatik, osasun publikoaren aurkako delitua egotzita. Atxilotuak 125 speed gramo zeramatzan Ertzaintzaren arabera.
