Iztuetaren dantzen erakustaldia, Ormaiztegin
Ormaiztegiko Zumalakarregi museoan Bergarako Besarkadari buruzko erakusketa dago ikusgai. Bertan, besarkadaren ondorengo ospakizunen berri ere ematen da. Juan Inazio Iztueta zaldibiarrak hainbat dantza prestatu zituen ospakizun haietarako eta Zumalakarregiko erakusketan haren lana aipatzen da. Atzo Iztuetaren dantzei buruz gehiago jakiteko aukera izan zen.
Mikel Sarriegi beasaindarrak Iztuetaren dantzen inguruko azalpenak eman zituen udaletxepeko aretoan. Sarriegik hamabost urtetik gora daramatza Iztuetaren dantzak ikertzen, eta beste dantzari batzuen testigantzak jasotzen, dantzen garapena aztertzeko.
Atzoko hitzaldian, zaldibiarrari buruzko bitxikeriak kontatu zituen, bideo, dantza pauso, janzkera eta beste hainbat materialen bidez.
Hitzaldia amaitutakoan, Iztuetaren dantzen erakustaldia egin zuten Aurtzaka taldeko dantzariek. Bergarako Besarkadaren lehenengo urteurrenean Bergarako ospakizun jaialdian egin zituzten dantza berberak egin zituzten Aurtzakakoek.
Iztuetak jaialdi hartan parte hartu zuen. Juan Inazio Iztueta 1767an jaio zen, Zaldibian. Idazlea eta dantzaria izan zen.
