Mutiloako zabortegiaren aurkako Goierri Birzirik plataformak hainbat protesta ekintzatan parte hartzeko deia egin die Goierritarrei, datozen egunerako. Bihar, elkarretaratzea egingo dute Ormaiztegin, eta balkoietan globo berdeak jartzeko deia ere egin dute, protesta gisa. Larunbatean berriz, GuraSos ekimenak Donostian egingo duen manifestazioan parte hartzeko deia egin dute.
Ormaiztegin, festen hasierarekin bat eginez, zabortegiaren aurkako jarrera kalera aterako dute. Izan ere,
Birziklatzeari bai, Mutiloako zabortegiari ez! lemapean elkarretaratzea deitu dute udaletxe aurreko plazan, 19:00etarako. Horrekin batera, herritarrei balkoietan globo berdeak jartzeko eskatu diete, zabortegiaren aurkako sinbolo eta protesta moduan.
Bestalde, Goierri Birzirik plataformak GuraSos ekimenarekin ere bat egin du hainbat ekintzatan. Asteartean, bi taldeek antolatutako hitzaldia egin zuten Itsasondon, erraustegiak osasunean izan ditzakeen kalteez ohartarazteko. Bide beretik, GuraSos-ek larunbat arratsalderako Donostian antolatu duen manifestaziora joateko deia egin dute. Goierritik trenez elkarrekin joango dira; hala, Legazpitik 14:42an ateratzen den trenera batuz joango dira elkarrekin, eta azken bagoian elkartuko dira.
