Ormaiztegiko San Andres jaien haserarekin bat eginez, dozenaka lagun elkartu ziren atzo iluntzean, udaletxe atarian, Goierri Birzirik plataformak deitutako elkarretaratzean parte hartzeko. Aurretik, sinadurak biltzen eta globo berdeak banatzen aritu ziren boluntarioak. Hain zuzen ere, globo horiekin irudikatu dute Mutiloako zabortegiaren kontrako protesta, herriko balkoi asko ere, globoz beteta baitzeuden atzo.
Ormaiztegiko bilkura ez da izan egun hauetarako Goierri Birzirik plataformak antolatutako ekitaldi bakarra. Atzo, Zaldibian ere izan ziren, informazioa eman eta sinadurak biltzen. Gaur berriz, GuraSos plataformak antolatuta Donostian egingo den manifestaziora joateko deia egin dute. Legazpitik 14:42an ateratzen den trena hartu, eta bagoi berean elkartuko dira.
