Goierri Gorri astindua hartuta etorri da Barakaldotik
Ligako azken partidan taldeak itsura ona eman bazuen ere, asteburuan Bizkaira egindako bisitan “galduta” ibili ziren gorriak, eta Barakaldok astindua eman zien, 4-0 irabazita.
Hamargarren minuturako goierritarren kontrako penaltia adierazi zuen epaileak, eta etxekoak 1-0 aurreratu ziren markagailuan. Goierri Gorri jota gelditu zen, eta aurreneko zati osoan ez zuten bururik altxatu. Aldageletara joan aurretik, bizkaitarren 2-0ekoa egin zuten.
Bigarren zatian, beste horrenbeste. Goierritarrek erreakzionatu eta aukera batzuk izan zituzten, baina ezin izan zuten markagailuko aldea murriztu. Barakaldok ordea, sortutako aukerak aprobetxatzen jakin zuen, 3-0ekoa eginez. Goierri Gorriren aldeko penaltia adierazi zuen epaileak, baina huts egin zuten. Partida bukatu aurretik etorri zen azken 4-0ekoa.
Jubenilek kale, kadeteek bale
Jubenilek aurreko astean atsedena izan zuten eta itzuli dira lehiaketara. Ez ordea nahi bezala. Larunbatean Arizti Handin zuten hitzordua, Tolosa lehen sailkatuaren aurka. Gol ugariko partida izan zen, baina tamalez goierritarren aurkako emaitzarekin. 2-3 irabazi zien Tolosak, eta beraz koska bat behera egin dute sailkapenean hirugarren postuarekin eginez.
Kadeteen bi taldeek bildu dituzte puntuak asteburuan. Ohorezko mailako taldeak 3-2 irabazi dio Intxaurdiri. Lehenengo mailakoek berriz garaipena ez, baina berdinketa eskuratu zuten. Partida oso parekatua izan zen gorriena, markagailuak erakusten duen moduan; 1-1. Goierritarrak aurreratu ziren, baina berehala egin zuten banakoa oriotarrek. Azken unean garaipena eskura izan zuten gorriek baina langara bidali zuten baloia.
Azkenik, infantilen mailan ez da aldeko emaitzarik izan. Txapeldunen fasean tokia aurkitu nahian jarraitzen du Goierri Gorri “B” taldeak. Asteburuan 12-2 galdu du Añorgaren zelaian. Kopan berriz Goierri Gorri “A”-k 1-5 galdu du etxean Urolaren aurka. Goierri Gorri “C”-k ere porrota ekarri du Bergara “A”-ren aurkakotik.
