Ordiziako Barrena kultur etxean Ikimilikiliklik erakusketa dago ikusgai martxoaren 24ra arte. San Telmo Museoak eta Euskal Herriko Unibertsitateko Mikel Laboa Katedrak antolatu eta Morgancreak ekoiztutako erakusketa hori Joxan Artzeren unibertso poetikoan zehar bidaia egiten duen bideoinstalazioa da. Erakusketa Artzek 40 urte baino gehiagotan garatutako lan poetikoan zehar egiten den bidaia da.
Joxan Artze oso ezaguna da herritarren artean Mikel Laboaren abesti ikonikoengatik, esaterako, Txoria txori, Gure Bazterrak edo Zaude lasai abestien letren egilea izateagatik edo bere anaia Jexuxekin txalapartari gisa aritzeagatik.
Baina Artzek obra sakona eta gutxi ezagutzen dena ezkutatzen du, artearen hainbat esparrutan garatu duena: poema-liburuak, audio-grabazioak eta ikuskizun eszenikoak. Azken horiejk, bere idatzizko proposamenak eszenatokira daramatzatenak, bere garaian abangoardiakoak izan ziren eta uneko baldintza soziopolitikoak medio, oso popularrak izan ziren.
Solasaldi-hitzaldia
Ikimilikiliklik erakusketaren harira, Mikel Laboa Katedrak solasaldi-hitzaldia antolatu du Alberto Lizarralderekin, bihar 19:00etan. Bideoinstalazioaren nondik norakoak eta hurbilketa bat egingo zaio J.A. Artzeren sorkuntza lanari.
