Gabiriako Rallyesprintean erabateko nagusitasuna izan dute Barrenetxeak eta Onandiak
Iaz, automobilismo lasterketetatik etenaldi luze bat bukatuta, Gabiria-Legazpiko Rallyesprinta irabazteko itzuli ziren Enrique Barrenetxea-Arando eta Anartz Onandia bizkaitarrak. Atzo, nagusitasun berberarekin errepikatu zuten garaipena, 19. Gabiria-Legazpi Rallyesprintean. Hiru erlojupekoak Barrenetxea eta Onandia bikoak irabazi zituen, Mitsubishi Evo IX autoarekin. Euskal Herriko auto lasterketen egutegiko lehenengo proba izan da, eta milaka ikusle bildu dira Gabiriatik Legazpirako errepidean.
Errepidea artean garbi zegoela baliatuta —lehenengo irten zen haien autoa—, aurreneko erlojupekoan denbora oso ondu zuten (4:34,6). Atzetik Jon Casais-Xabier Altube sailkatu ziren (Megane F2000), 12 segundora, eta Gorka Antxustegi-Mirari Arruti hirugarren (Suzuki Swift Sport), 13 segundo eskasera.
51 kotxek hasi zuten lasterketa, eta arratsaldea aurrera joan ahala, ohi bezala, asko zikindu zen errepidea. Denbora ez hain onekin, baina Barrenetxeak 2. erlojupekoa 4:43,8 minutuan itxi zuen, eta azkenekoa 4:48,7an.
Barrenetxea-Arandok eta Onandiak bigarren garaipena dute jarraian Gabirian (denera 14:07,16 minutu). Atzo, 2. postuan Casais-Altube geratu ziren (22,7 segundora), eta hirugarren Antxustegi-Arruti (27,09ra). 38 taldek bukatu zuten lasterketa.
Enrique Barrenetxea-Arando eta Anartz Onandia garaileak, atzo, Mitsubishi Evo IX ahaltsuarekin./Eduardo Maturana-EAF
