Hiru lagun atxilotu dituzte asteburuan Beasainen, bi talderen artean izandako borroka bat tarteko dela. Europa Press albiste agentziak jakinarazi duenez, 18, 19 eta 22 urteko hiru gizonezko dira atxilotuak. Gertakariak larunbatetik iganderako gauean izan ziren, 03:30ak aldera, Zaldizurreta kalean. Bi lagun talderen artean liskarra sortu zen, eta borrokan bukatu zuten. Lau gazte Zumarragako ospitalera eraman behar izan zituzten.
Ertzaintzak borroka baten abisua jaso eta gero, hainbat patruila bertaratu eta hainbat gazte borrokan ari zirela ikusi zuten. Lekukoen testigantzak jaso eta gero, gertakarien tokian bertan jarraitzen zuten hiru gazte –ustezko erasotzaileak– identifikatu zituzten. Ertzaintzako iturrien arabera, “oso jarrera biolentoa” erakutsi zuten, eta ertzain bat kolpatzen ere saiatu ziren. Atxilotu eta epaitegien esku utzi zituzten igandean. Halaber, gutxienez lau lagunek mediku asistentzia behar zutela ikusi zuten; ebakiak eta kolpeak izateaz gain, bazen hortzak falta zituenik ere.
