Pasaera azkarra egin du Euskal Herriko Itzuliak Goierritik
Udanatik barrena sartu da, eta 25 kilometroren ondoren Mandubiatik Azpeitia aldera jo du
Euskal Herriko 57. Txirrindulari Itzuliak tarte labur batean zeharkatu ditu gaur Goierriko errepideak. Gaur Gasteiztik Donostiara arteko etapa jokatzen ari da (160,5 km), eta 14:30ak aldera Udanatik barrena sartu ondoren, Mandubiako gainean agurtu du 15:15 inguruan. Jende mordoxka bat inguratu da Mandubiara txirrindularien pasaera ikustera.
Ihesean dabilen bederatzi laguneko taldea izan da lehena Mandubiako gaina hartzen: Nibali, Howes, Capecchi, De Marchi, Rossetto, Montaguti, Fuglsang, Pardilla eta Courteille. Tropel nagusia 3:35era pasatu da, Sky eta Movistar taldeak buru zirela. Donostian amaituko da etapa, 17:30ak aldera.
