Kapela eta larrain dantzak egin dituzte Legazpin
Legazpiko Santikutz jaien hondarrean, ohiko Kapela eta Larrain dantzak egin dituzte gaur, Euskal Herria plazan. Sustraiak Dantza Taldeak urteak daramatza dantza horien inguruko ikastaroak egiten, eta gaurkoa izaten da plazan eta jendaurrean egiteko garaia.
Dantza horren jatorriari dagokionean, burdinoletatik datorrela uste dute adituek. Izan ere, oletan ohikoa zen ferroien kofradiek Gizon Dantza egitea. Burdinoletako ordezkariek Kapela Dantza egiten zuten, nonbait, ferroiek erabiltzen zuten kapelarekin egiten zelako. Dantza hori 1930eko hamarkadan desagertu zen, baina Sustraiak Dantza Taldeak berreskuratu egin zuen, eta 1996. urteaz geroztik, urtero egiten da. Lehen Santikutz Txiki egunez egiten zen, maiatzaren 4an, baina 2011. urtetik, Mirandaolako Egunaren bezperan egiten da.
