Urola Garaia BTT Maratoian 421 txirrindularik parte hartuko dute
Larunbatean Urola Garaia BTT Maratoiaren bosgarren edizioa egingo dute Urretxu eta Zumarragan. Aurten 421 txirrindularik parte hartuko dute. Mendiko bizikletaz beteko dira bi herriok. Txirindulariak 08:30ean abiatuko dira Areizaga-Kalebarren plazatik.
Larunbatean Urola Garaia BTT Maratoiaren bosgarren edizioa egingo dute Urretxu eta Zumarragan. Aurten 421 txirrindularik parte hartuko dute. Mendiko bizikletaz beteko dira bi herriok.
Txirindulariak 08:30ean abiatuko dira Areizaga-Kalebarren plazatik. Eguraldi txarra egiten badu, irteera eta helmuga Gernikako Arbola plazan egongo dira bertako karpa anoa postu bezala erabili ahal izateko.
Parte hartzaileek, urteroko moduan, bi ibilbide izango dituzte aukeran. Bata 80 kilometrokoa eta bestea 40koa. Ibilbide luzekoek Goierri garaiko lau mendi ezagunenak igoko dituzte: Korosti (951 metro), Irimo (896 metro), Izazpi (967 metro) eta Beloki (651 metro). Ibilbide motzekoak Korosti eta Irimotik pasako dira.
Ibilbide luzeak 3.200 metroko desnibela du eta motzak 1.800ekoa. Hori guztia gutxi balitz, bi ibilbideen zatirik handiena bidexka estuetatik pasatzen da.
Parte hartzaileek hiru aparkaleku (La Salle-Legazpi ikastetxeko patioan, Garaialde lizeoan eta Gainzuri ikastetxearen saskibaloi zelaian), dutxatzeko bi toki (bi kiroldegietan) eta bizikleta garbitzeko toki bat (Ederrena pilotalekuaren atzealdean) izango dituzte.
Gainera, proba hasi aurretik gosaltzeko aukera izango dute eta ibilbidean zehar lau anoa postu egongo dira (aurreko ur-teetan baino bat gehiago): Korostin, Deskargan, Aizpurutxon eta Pagotxetan. Gainera, Helmugan ere indarrak berritzeko aukera egongo da.
Dortsalak bihar eta etzi hartu ahal izango dira, pilotalekuan. Bihar 18:00etatik 20:00etara eta etzi 07:30etik 08:15era.
Proba hau Goierri kirol elkartearen mendi sailak antolatzen du eta GOIERRIKO HITZAren babesa du.
Oso proba gogorra
Mikel Beitia antolatzaileak egunotan euri asko egiten ez badu ez dela lokatz asko egongo dio. «Bai guk eta bai parte hartzaileek, nahiago dugu lokatz gutxi egotea».
Izan ere, proba honek ez du lokatzik behar oso gogorra izateko. «Kanpotik datozenek maratoiaren gogortasuna azpimarratzen dute. Euskal Herriko proba gogorrena da, ez baitago atsedenik. Txirrindulariak une oro gora eta behera ibiliko dira», amaitu du Beitiak.
