Ehunmilak: Laurehungo muga gainditu du
Ehunmilak ultra-traileko partaidetza kopurua goraka doa urtez urte. Beasaingo irteera puntuan 400 baino gehiago izango dira aurrenekoz. Imanol Aleson ez da lehian arituko
Dagoeneko zortzigarren edizioa du, eta ez du aurkezpen handirik behar Ehunmilak ultra-trailak. Beasaingo Loinazko San Martin plazatik abiatuko dira mendi-lasterkariak ostiralean, 18:00etan, eta 168 kilometroko ibilbidea osatzeko erronka dute aurretik, eta 11.000 metroko gorakako desnibel positiboa –ikus beheko profila–.
Datu bat aipatzekotan, azken edizio honetan partaide kopuruak izango duen gorakada da. 409 izan dira izena eman dutenak –muga 515ean dago–, iaz baino 54 gehiago eta orain bi urte baino 137 gehiago. Horietatik 168 euskal herritarrak dira –iaz 168–, eta nabarmena da estatuko korrikalarien kopuruak izandako gorakada –iaz 149, aurten 196–. Estatuz kanpokoen parte-hartzea 36tik 45era igo da; emakumezkoena, aldiz, 21etik 20ra jaitsi.
Iazko bi irabazleak dira aurten ere irabazteko hautagai nagusiak: Javi Dominguez –hirutan irabazia– eta Silvia Trigueros. Irteeran izango ez dena Imanol Aleson azkoitiarra da –hau ere hirutan garaile izana–. Honakoek osatzen dute faboritoen zerrenda: Jon Aizpuru, Ion Azpiroz, Erlantz Zaldunbide eta Kenichi Yamamoto mutiletan, eta Elena Calvillo, Agurtzane Argiarro, Gemma Avelli, Jone Urkizu eta Ewa Majer nesketan.
409
mendi lasterkari. Ehunmilen 8. edizioan parte hartuko duen mendi lasterkari kopurua –iaz 355 izan ziren–. Horietatik 389 gizonezkoak dira, eta 20 emakumezkoak. Euskal herritarrak. Euskal herritarrak dira Ehunmilak proban parte hartuko duten korrikalarien erdiak –158 gizonezko eta 10 emakumezko–. Gipuzkoakoak dira 69, Bizkaikoak 59, Arabakoak 29 eta 11 Nafarroakoak. Estatu mailakoak. Espainiako estatutik 196 korrikalari datoz –189 gizonezko eta 7 emakumezko–. Herrialde Katalanetakoak dira gehienak, 82: Alacant (5), Bartzelona (31), Balear Uharteak (9), Castello (4), Girona (7), Lleida (1), Tarragona (15) eta Valentzia (9). Kantabria (17), eta Madril eta Malaga (11na) dira kopuruz nabarmentzeko beste herrialdeak. Estatuz kanpokoak. Guztira 45 izango dira–42 gizonezko eta 3 emakumezko–. Portugal (19), Frantzia (7), Inglaterra eta Polonia (3na), Alemania, Argentina eta Herbereak (2na), eta AEBak, Andorra, Austria, Uruguai, Japonia, Suedia eta Hungaria bana. IAZKO PODIUMA Gizonezkoak 1. Javi Dominguez ……….. 23:22:37 2. Adur Mendizabal …….. 24:28:41 3. Jon Aizpuru ……………. 24:54:39 Emakumezkoak 1. Silvia Trigueros ……….. 29:45:08 2. Severine Duhalde ……. 35:23:54 3. Agurtzane Argiarro …. 37:25:42 ERREKORRAK · Gizonezkoak – Imanol Aleson (2013) …………. 22:59:19 · Emakumezkoak – Nerea Martinez (2011) …… 28:00:56
