Amaia Eskisabelek eta Xiker Rokandiok irabazi dute Ormaiztegiko harrikalari txapelketa

Toka txapelketan Borja Argiñano eta Serafin Ferreira izan dira onenak.

Goierriko Hitza

2017/09/23

Amaia Eskisabel izan da irabazlea Harrikalari txapelketan

Uda bete-beteko eguraldiarekin ari dira ospatzen ormaiztegiarrak San Migel eguna. Toka txapelketa Borja Argiñanok eta Serafin Ferreirak irabazi ondoren, Berjaldegi zelaia bilakatu da festa gunea, harrikalari txapelketarekin. Emakumezkoak izan dira lehenak 2,080 kiloko harri borobila jaurtitzen. Amaia Eskisabelek 12,55 metrora bota du harria, Marina Alvarezek 11,23 metrora eta Leire Irizarrek 10,50 metrora. Gizonezkoetan, Xiker Rokandio izan da irabazlea, harria 25,90 metrora botata. Bigarren postuan Haritz Maiz gelditu da (25,54 m.) eta hirugarren David Perez de Alveniz (25 m.). Harrikalari txapelketako errekorra Borja Irizarrek du: 28 metro eta 95 zentimetro. Harrikalari txapelketa bukatutakoan, Kataluniari elkartasuna adierazteko elkarretaratzea egin dute. Arratsaldean Arratsaldean ere festak jarraituko du. 16:00etan mus txapelketa eta karikatura tailerra izango dituzte. 16:30ean futbol-3 txapelketa hasiko da Ibaialde kaleko pistan, eta haurrentzako jokoak eta askaria plazan. 17:45ean San Migel tortilla txapelketa jokatuko dute eta 20:15ean sagardo kupelaren irekiera. Gauean, 21:00etan, herri afaria egingo dute.

Azken elkarrizketak

Azken bideoak

Argitalpen bereziak