Pinotxoren euskarazko musikala Lazkaon egingo dute, hiriez aparte
Azaroaren 18an Arerian taularatuko du Oñatiko Ganbara Faktoriak. Ekoizpen handia da: 35 aktore, 80 pertsonaia, 6 dekoratu eta 75 laguneko lantaldea. Aitor Biain da gidaria
Broadway erako Pinotxo, hariekin lotu gabe musikal dinamikoa, arina eta argitsua Lazkaora iritsiko da, azaroaren 18an (17:00etan, Arerian). Bi orduko iraupeneko ekoizpen landua da; euskaraz, gainera. Oñatiko Ganbara Faktoriak bi urtean landu du ikuskizuna, Lazkao Txiki Musika Eskolako irakasle Aitor Biain zuzendari dela. Sarrerak udaletxean ari dira saltzen (10 euroan); gutxi geratzen dira ja.
«Berezia da niretzat Lazkaon egitea, nire lantoki izan delako», aitortu zuen, herenegun, Biainek. Hain justu, Pinotxo, hariekin lotu gabe ikusteko aukera bakanetakoa izango da. Oñatin estreinatu zuten (3 emanaldi, 1.500 ikusle), eta Donostiako Kursaalen beste 1.400ek ikusi dute. Birari Lazkaon segiko diote. Abenduaren 27an Bilbora (Euskalduna) eta urtarrilaren 3an Iruñera (Gaiarre) iritsiko da.
Musikal «anbiziotsua»
Euskaraz musikal generoko lan gutxi egin badira, gutxiago oraindik halako produkzio-mailakoak. 35 aktore aterako dira, eta 80 pertsonaia antzeztuko dituzte. Sei dekoratu, argiztapen ikusgarria eta 75 lagunetik gorako lantaldea ariko dira Pinotxoren ipuina kontatzen.
Antzerkia, txotxongiloak, magia, ikus-entzunezkoak eta musika uztartuko dira. Oñatiko Ganbara Txiki haur abesbatza du muinean. Bi ordukoa da antzezpena, eta tartean atseden etena izango du.
«Askok Disneyren historia tristea gogoratuko dute Pinotxo entzutean. Baina ez da hala. Argitsua eta polita izango da Pinotxo, hariekin lotu gabe. Mezu asko ditu barnean, umeentzat batez ere. Baina familia osoarentzat modukoa da», dio Biainek.
Ganbara Txikik, 2004an sortua, 2015ean sortu zuen lehenengo musikala: Altxorraren uhartea. Azken bi urtean produkzio lanean jardun dira, Pinotxo, hariekin lotu gabe moldatzeko. «Lan handia izan da: libretoa euskaratu, egokitu, abestiak aukeratu, letra ipini. Eta produkzioa. Izugarrizko diseinua da».
Ikuskizunaren musika CD diskoan argitaratu dute, eta oraintsu DVDan ere bai. Emanaldian erosi ahalko dira, edo Oñatiko Txokolateixian edo Ganbara Txiki koruari eskatuta. 
