Santboiana talde indartsuaren bisita jasoko dute asteburuan Ampo Ordiziako mutilek. Partida igandean izango da, 12:00etan, Altamira zelaian.
Talde katalana goierritarren aurkari zuzenetako bat da play offetako lehian. Iazko Kopako Txapelduna 5. postuan dago 41 punturekin; ordiziarrek baina 10 puntu gehiago dituzte. Bi taldeek antzeko filosofia dute gainera, harrobiko lanari garrantzia handia ematen diote, eta taldea indartzeko atzerriko jokalari batzuk fitxatzen dituzte. Kontuan hartu beharreko jokalariak Albert Millan, Nil Baro eta Afa Taulli izango dira, batez ere.
Joaneko partidan ordiziarrek 29-22 galdu zuten Katalunian, eta oraingoan emaitza hori irauli eta zaleei poz bat eman nahi diete. Garaipena behar dute play offetara sailkatzeko aukera galdu nahi ez badute.
Siosiua Moala, fitxaketa berria
Gaur iritsiko da Ampo Ordiziak fitxatu berri duen Siosiua Moala. Zeelanda Berritik dator eta hirugarren lerroan jokatzen du. Oraindik erabakita ez badago ere, igandean bertan izan lezake estreinaldia, minutu batzuk jokatu eta taldearen jokoa ezagutzen hasteko.
