Ikatzak 12. urtez argazki rallya antolatu du Legazpiko Gipuzkoako Artzain Egunean
Datorren igandeko lehiaketan helduek zein haurrek parte hartu ahal izango dute
Ikatza argazkilari elkarteak antolatuta, Batis Goikoetxearen omenezko XII. Argazki Rallya egingo dute etzi Gipuzkoako Artzain Egunaren harira, bertan helduek zein haurrek parte hartu ahal izango dute.
Parte hartzaileek izena etzi bertan eman beharko dute Ikatzaren egoitzan, Legazpiko Kultur Etxearen atzeko aldean, 09:00etatik 10:00etara. Izena ematerakoan helduek 8 euro eta hamasei urtez azpiko gaztetxoek nahiz haurrek euro bana ordaindu beharko dituzte. Aurten jorratu beharreko gaiak izena ematerakoan jakinaraziko dizkiete parte hartzaileei.
Argazki txartela 12:30etik 13:30era utzi beharko dira Ikatzaren egoitzan; txartelak ezingo ditu 36 argazki baino gehiago bildu eta horietatik bilduma bakarra aukeratu beharko dute egileek. Ondoren, mezu elektroniko bat bidali beharko dute ikatzarallya@gmail.com postara aukeratu dituzten irudien zenbakiaz adieraziz eta egileen izenak gehituz. Azken urrats hori irailaren 9a baino lehen egin beharko dute derrigor.
Sari banaketa irailaren 28an egingo dute Legazpiko Kultur Etxeko areto nagusian. Guztira, zazpi sari banatuko dituzte, lau helduen artean eta beste hirurak haurren zein gaztetxoen artean. 
