Ikastaroetan eta kirol jardueretan izena emateko garaia heldu da
Datorren astean hasiko dira hainbat ikastaro, beste hainbat urriarekin batera hasiko dira
Ikasturte berriarekin ikastaroen eskaintza zabaldu eta izena emateko parada dago. Helduek taila, eskulanak edo joste lanak dituzte aukeran Legazpin bertan eta haurrek pintura, pilota edo saskibaloia.
Astelehenetik aurrera eta irailaren 28ra arte Irulek antolatutako hiru ikastaroetan izena eman daiteke. Eskulanetako ikastaroa urrian hasiko da eta ekainera arte egingo dute, astearteetan eta ostegunetan 15:00etatik 17:00etara. Izena kultur etxean eman daiteke, hilean 35 euro ordaindu beharko dira. Puntu ikastarorako izena ere kultur etxean eman behar da, eskolak urrian hasiko dira eta asteazkenetan emango dituzte eskolak 17:30etik 19:30era; hilero 25 euroko kostua du. Josteko lan txikien ikastarorako izena kultur etxean eman behar da ere bai, urrian hasiko dira eta asteazkenean egingo dute, 14:30etik 16:30era; 25 euro dira hileko.
Arkatza pintura eta marrazketa elkartean datorren astelehenean hasiko dira eskolak, oraindik tokia badago eta izena astelehenean ere eman ahalko dute interesa dutenek.
Datorren astean Txirbil elkarteak antolatzen dituen taila ikastaroetan izena eman ahal izango da astelehenetik ostegunera, irailak 13; ikastaroak hilaren 11n hasiko dira.
Saskibaloia eta pilota
Legazpiko Gazteak pilota elkarteak 2012tik aurrera jaiotako haurrei deia egin die. Datorren denboraldirako izena datozen irailaren 10ean, 12an, 17an eta 19an eman ahalko dute Urbeltz pilotalekuko lokalean 16:30etik 18:00etara. Entrenamenduak urriaren 1ean hasiko dira.
Andraitz saskibaloi taldekoek sei talde atera nahi dituzte 2001etik 2006ra arte jaiotako gaztetxoekin. Hitzordua biharko egin dute Bikuñan, 19:00etan edo 605 74 69 44 telefonora deituta egin daiteke izen-ematea. 
