Ekinez eginarazteko sortua

Goierriren garapenerako eta goierritarren bizitza kalitatea hobetzeko sortu zen Goieki .Bailarako 18 udalerriek osatzen dute .Garai zailean abiatu zen, erronka berriak ditu orain

Goierriko Hitza

Goierri

2018/12/19

Goiekiko Administrazio Kontseiluak aste honetan bertan egin duen bilera / Mikel Albisu

Goierriko herritarrek dituzten premiei aurre egiteko konpromisoa duten bailarako 18 udalerriek osatzen dute Goieki garapen agentzia. 1993. urtean sortu zen Euskaldeko Plan Estrategikoa eragingarri egiteko. Zeregin horren egunerokoan etorkizun ikuspegia duen eta eskualdearen aurrerapen kolektiboan inplikatuta dagoen profesional talde bat aritzen da lanean, industria, turismoa eta ekintzailetza bultzatzen eta dinamizatzen. Sorrera hartatik 25 urte igaro dira, eta hiru ardatz horien garapenari esker, ekosistema sozioekomiko oparo, lehiakor eta balio erantsi handiko baten jabe da Goierri bailara, enpleguari eta ongizateari bide ematen diona. Herriak, enpresak eta pertsonak eskualdearen onerako batzeko bokazioa du. Gaur egungo Goierriren egoera ekonomikoa ona da, langabezia tasa baxua du eta industriaren sare indartsua. Goieki sortu aurreko garaiak, ordea, oso bestelako argazki bat erakusten du. Industria krisi sakona 1980ko hamarkadako industria krisialdiak berealdiko jipoia eman zion Goierriko industriagintzari. 1982-1992 hamarraldian Goierriko industria sareak atzerapauso handia izan zuen, eta Goierrik sekula ezagutu gabeko egoera bat bizi izan zuen:? enpresa askoren itxiera eta langile ugariren kaleratzea. Hiru mila lanpostu baino gehiago galdu ziren, eta langabezia tasa %20-25 artekoa zen. Enpresa nagusienak egoera txarrean zeuden, eta ez zen aurreikusten egoerak hobera egingo zuenik. Fundazioaren sorrera Industria krisi orokor horri beste bat gehitu zitzaion orduan, Goierri Lanbide Eskolaren krisia. Eskolaren egoera ez zen batere ona, eta lanbide heziketa erabat desprestigiatua zegoen garai hartan. 1986. urtean Goierriko Herrien Ekintza Fundazioa sortu zuten Goierriko 18 udalek eta hainbat enpresek, Goierri Eskolarekiko zuten konpromisoan sakonduz. Era berean, hartu beharreko erabakiak koordinatu eta bideratzeko egin beharreko diru inbertsio guztiak egiteko konpromisoa hartu zuten alde guztiek. Eskola ospea irabazten hasi zen, eta Hetel elkartearen (Lanbide Heziketako Ikastetxeen Elkartea) sorreran parte hartu zuen era aktibo batean, eta harrezkeroz zuzendaritza taldeko kideetako bat da. Plan estrategikoa Goierri Lanbide Eskolaren egoera bideratuta (1987-1990), eskualdearen egoera ezkorrari aurre egiteko gogoeta estrategiko bat egitea erabaki zuten eskualdeko udalerri guztiek enpresa nagusienekin elkarlanean. Eragile soziekonomiko guztiek (alderdi politikoak, enpresak, sindikatuak, gainontzeko eragileak…) egoeraren irakurketa bateratua egin zuten: Goierriren indargunea metalaren industria zela, eta horretan sakondu behar zela lehiakorrak izaten jarraitzeko. 1992an Eskualdeko Plan Estrategikoa onartu zuten aho batez eragile guztiek. Plan hori 2005. urtean eguneratu zen.

“Herri eta erakundeak proiektu baten alde batzeak egiten du proiektua ona izatea”

“Erakundeek tresnak eta helburuak nahasi eta aurreneko horiek lehenesteko arriskua izaten dute”
Juan Manuel Barandiaran (Goiekiren lehen kudeatzailea)

Egitasmo hori gauzatzerakoan bi errealitate bereiztu ziren;?batetik, Goierriko Herrien Ekintza Fundazioarena (eskualdeko enpresei formakuntza eta ikerketa zerbitzuak ematekoa), eta bestetik, plan estrategikoa jorratu eta garatu ahal izango lukeen tresna baten sorrera. Goiekiren sorrera Plan estrategikoan aurreikusten ziren helburu eta jarduera integralei erantzun bizkorrak emateko gai izango zen egitura bat sortzea izan zen gakoa, abiadura azkarreko gizarte batek zituen erronkei erantzun ahal izateko. Goierriko 18 udalerriek 1993an eratu zuten Goieki (Goierriko Ekimena SA), eskualdearen garapen sozioekonomia dinamizatu eta goierritarren bizitza kalitate hobetzeko helburuarekin.

Udal guztiek osatzen dute batzarra, kontseilua berriz, 11 udal ordezkarik

Goierriko udalerri guztiek osatzen dute Goiekiren batzar orokorra, eta hari dagokio garapen agentziaren urteko diru kontuak eta jardueren memoriak onartzea. Administrazio kontseilua, berriz, udaletako 11 ordezkarik osatzen dute. Udal agintaldi bakoitzeko berritzen da kontseilua, eta alderdi politikoen hauteskunde emaitzaren arabera banatzen da ordezkaritza. Kontseiluari dagokio Goiekiren kudeaketa plana eta aurrekontuak onartu eta jarraipena egitea. Goiekik 1,3 milioi euroko aurrekontua kudeatzen du urtean. Kontseiluko ordezkaritza biztanleriaren araberakoa da. Beasainek hiru ordezkari ditu, Ordiziak bi eta Lazkaok bat. Beste bostak gainontzeko herrien artean banatzen dira. Lehendakaritza hiru herri nagusienetako alkateek hartzen dute, txandaka. Lehen lehendakaria Inazio Estensoro Lazkaoko alkatea izan zen, eta lehen kudeatzailea, berriz, Juan Manuel Barandiaran ataundarra. Barandiaranek zortzi urte egin zituen zeregin horretan (1993-2001) –aurrez Goierri Fundazioko eta Goierri Eskolako zuzendari izana zen–, harik eta 2002an Iker Galparsoro ordiziarrari lekukoa eman zion arte. Talde txiki eta dinamikoa Goiekiko lantaldea oso orekatua izan da beti. Sei langile finko ditu, eta beste 6-8 lankide proiektu eta egitasmoen arabera aldatzen joaten dira. Bost arlo nagusitan banatzen da Goiekiren egunerokoa: Industria arloa, Ekintzailetza (Enpresa Ekimen Berrien Zerbitzua), Turismoa (Goitur arduratzen da dinamizazioaz), Ingurumen arloa eta Gizarte arloa. Adimen lehiakorra izeneko beste arlo bat abiatu du azken urteetan Goiekik.

Azken elkarrizketak

Azken bideoak

Argitalpen bereziak