Goierri garaiko judo eta jiu jitsu taldeetako kideak Madrilen lehiatu dira
Legazpiko Judo taldeko zortzi eta Zumarragako Jiu Jitsu taldeko lau kideek parte hartu dute. Espainiako junior eta kadete mailetako lehenengo kopan parte hartu dute, Madrilen
Madrilgo Villaviciosa de Odon herrian jokatu berri da Espainiako lehenengo Jiu Jitsu Kopa kadete eta junior mailan. Goierri garaiko judo eta jiu jitsu taldeetako hamabi lagunek parte hartu dute, hala Legazpiko judo taldekoak nola Zumarragako jiu jitsu taldekoak.
Jon Odriozola legazpiarrak urrezko domina lortu zuen Borroka modalitateko 62 kilo azpiko junior mailan. Haatik, garaipen mingotsa izan zen aurkariak min hartu zuelako borrokaldian eta are mingotsagoa aurkari madrildarra laguna duelako.
Eneko Zabaleta eta Unai Guridi legazpiarrek bikotea osatu zuten eta, lehen aldiz halako proban parte hartu bazuten ere, bosgarren egin zuten hamaika bikoteren artean. Manex Urrizak ere bosgarren egin zuen 60 kilo azpiko kadeteen mailan; bosgarrena izan zen hamahiruren artean. Maila berean aritu zen Unai Guridi eta, lehian eskarmentu gutxi izanda ere, brontzea ekarri zuen. Damian Vela 66 kilo azpiko kadeteetan neurtu zen eta, zortea alde izan ez zuen arren, zazpigarren postua lortu zuen.
Zumarragako judo taldekoei dagokienez, Aratz Irisarri Espainia mailan lehiatzen zen lehenengo aldia izan zen, baina urrezko bi domina lortu zituen, bata Borrokan eta bestea Ne Waza modalitatean.
Urrea eta zilarra
Markel Biainek lan ona egin zuen eta Irisarri bezala bi modalitateetan lehiatu zen 46 kilo azpikoen kadeteen mailan. Bi urre lortu zituen. Amets Alonsok borroka zailak izan zituen bi modalitateetan; Borrokan hamaikagarren egin zuen eta Ne Waza-n brontzea lortu zuen. Ander Lizarralde Borroka modalitatean aritu zen 60 kilo azpikoen kadeteetan. Teknikoki oso borroka onak egiten ari da, baina aurkaria ez zen finalera iritsi eta Lizarralderi aukerak kendu zizkion; hamaikagarren egin zuen.
Imanol Lamelak urrea lortu zuen Ne Waza-n 77 kilo azpiko juniorretan eta Aitor Aristuk zilarra. Biak legazpiarrak dira. Asier Larrañagak ez zuen lehiaketan parte hartzerik izan orain aste batzuk min hartu, eta ez delako erabat osatu.
