Hemezortziko bertsolari taldean 8 debutariak dira, gazte sariketetan
Ordiziako Argi-Berrin hasiko da Goierriko lehiaketa-sorta, martxoaren 30ean. Gero Osinberde eta Aztiria etorriko dira, asteko. Osinaldeko finala apirilaren 27an da
Beste urte batez, eta badira jada 48, bertsolari gazteentzat sariketa-eskaintza apartekoa jarriko du Goierrik. Aurreko aldietan bezalaxe, Zaldibian, Aztirian eta Ordizian jokatuko dira lehiaketa bana, eta horietatik sailkatutako bina bertsolariek Gabirian jokatuko dute finala.
Txandan-txandan joan ohi direnez, Ordiziako Argi-Berri Sariari egokituko zaio aurten irteera ematea. Martxoaren 30ean jokatuko da 22. sariketa. 1998an antolatu zuten lehena, eta Osinalde aurreko sailkatze fasea hasi zenetik gaurdaino iraun duen bakarra da.
Ohi bezala, kasu guztietan lehenbizi afaria egingo dute (20:30ean), eta ondoren bertso-saioa. Argi-Berrin Eli Pagola (Hernani, 1995), Paule Loizaga (Sopela, 1997), Elixabet Etxandi (Izpura, 2000), Danel Olano (Getaria, 1997), Kerman Diaz (Urruña, 1998) eta Jokin Irastortza (Oiartzun, 1999) ariko dira.
Guztira antolakuntzak gonbidatu dituen 18 bertsolarietatik, zortzi debutariak dira Goierriko sariketetan. Beste seik bigarren aldia dute, eta lauk hirugarren eta azkeneko aukera (hiru aldiz deitzen diote bakoitzari, gehienez). Iaz, Osinalde sarian sei bertsolariak lehen aldiz aritu ziren. Haietako hiru finalistak parte hartuko dute aurten: Eli Pagolak, Oier Etxeberriak eta Peru Abarrategik.
Zaldibian eta Aztirian segi
Bigarren sariketa baliagarria Zaldibiako 7. Osinberde izango da, apirilaren 6an. Ane Beloki (Legazpi, 1999), Unai Anda (Murgia, 1999), Oier Etxeberria (Azpeitia, 1997), Markel Eizagirre (Zarautz, 1995), Ane Zuazubiskar (Arrasate, 1997) eta Andoni Mujika (Urnieta, 1999) dira bertsolariak.
Azken kanporaketa, Aztiriko 20. Saria (2000n hasi zen hura), apirilaren 13an da. Peru Abarrategi (Aramaio, 1997), Joanes Illarregi (Leitza, 1999), Ane Peñagarikano (Zarautz, 1999), Josune Aramendi (Markina-Xemein, 1994), Ibai Amillategi (Gernika-Lumo, 1993) eta Beñat Mujika (Donostia, 1998) dira han.
Goierritar bakarra ariko da aurten, Ane Beloki legazpiarra. Hirugarren parte-hartzea du.
