Emari berria eta beteranotza batuko ditu Osinalde bertso sariketak, bihar
Zuazubiskar, Illarregi, Olano eta Amillategi debutariak, eta iaz ere Gabirian kantatutako Pagola eta Etxeberria ariko dira. 1997ko gipuzkoarrak dira gehienak. 48. sariketa da
Mendi erdiko langara bidean, Gabiriako Osinalde bertso sariketak 48. ekitaldia bihar izango du. Ohi bezala, sei bertsolari gaztek parte hartuko dute, eta bertso-afari egitura edukiko du.
Ordiziako Argi-Berritik sailkatutako Danel Olano eta Eli Pagola, Zaldibiako Osinberdetik Ane Zuazubiskar eta Oier Etxeberria, eta iragan apirilaren 13an Aztiriko sarian azken bi txartelak lortu zituzten Joanes Illarregi eta Ibai Amillategi ariko dira kantuan.
Aztirian, epaileen puntuazioz onena Illarregi leitzarra izan zen. Entzuleen gustukoenaren saria ere hark jaso zuen, eta, horrenbestez, Aztiri Sariaren garaile izendatu zuten. Puntuetan bigarrena Amillategi geratu zen.
Bihar, Osinalde elkartean afaria 20:30ean hasiko da, betiko menuarekin: arkume odolez eta tripotxez egindako pikatxa-tortilla, arkume errea, eta gazta menbriluarekin. Saioari 22:30a aldera ekingo diote. Sarrera libre da entzuleentzat.
Izerdi berria eta jakintza
Osinaldeko sei bertsolarietatik bik badakite lehendik han kantatzea zer den. Etxeberria (hirugarren partaidetza du Goierriko sariketetan) eta Pagola iaz ere iritsi ziren finalera. Olano, Zuazubiskar eta Illarregi sailkatze saioa irabazita sartu dira. Amillategik estreinako aldiz gonbidatu dute.
Beren gaztetasunean, bertsokera landua eta txapelketa-esperientzia aipagarria dute debutariek. Joanes Illarregi, adibidez, Nafarroako Txapelketako finalista da, Xabat anaiarekin batera. Nafarroako Eskolartekoa bat-batean hiru aldiz eta paperetan bitan irabazia da.
1997ko labealdiak hartu du txanda. 22 urte beteko dituzte aurten Osinaldeko hiru finalistak. Zaharrena Amillategi debutaria da, 26 urterekin; gazteena, Illarregi, 20rekin.
Lurraldetasunari dagokionez, gipuzkoarrak dira gehienak: lau. Bizkaitar eta nafar banak osatuko dute seikoa. Genero aldetik, bi neska, lau mutilen aldean.
Epaileek izendatuko dute Osinaldeko irabazlea, puntuz. Bertso onenaren eta entzuleen sariak ere emango dituzte.
48. OSINALDE SARIA
Eguna: Bihar, larunbata.
Ordua: Afaria 20:30ean, saioa 22:30ak aldera (sarrera libre).
Tokia: Osinalde elkartea (Gabiria).
Bertsolariak:
· Danel Olano (Getaria, 1997)
· Eli Pagola (Hernani, 1997)
· Ane Zuazubiskar (Arrasate, 1997)
· Oier Etxeberria (Azpeitia, 1997)
· Joanes Illarregi (Leitza, 1999)
· Ibai Amillategi (Gernika-Lumo, 1993)
