Eman dute lehen pausoa
Gipuzkoa Bertsotan sailkapen fasean parte hartu duten hamalau bertsolari goierritarretatik bederatzi sailkatu dira Gipuzkoako Bertsolari Txapelketarako
Bertsolaritzak Gipuzkoan bizi duen egoera onaren erakusgarri izan da Gipuzkoa Bertsotan sailkapen fasea. 84 bertsolari, 14 saio eta ehunka ikusle bildu ditu kanporaketak. Antolatzaileak ere gustura daude, eta oso balorazio baikorra egin du Iker Iriartek, Gipuzkoako Bertsozale Elkarteko kideak: «Udaberriko fase hau ikusita, aurrekari ezin hobeak ditugu udazkeneko txapelketari begira». Goierritik 14 bertsolari aurkeztu ziren, eta bederatzik lortu dute langa gainditu eta Gipuzkoako Bertsolari Txapelketarako sailkatzea.
Amaia Iturriotz urretxuarra, Asteasun // GBE
Harrobia indartsu datorrenaren adierazle izan dira Amaia Iturriotz urretxuarra, Eneko Araiztegi segurarra eta Mikel Tapia ataundarra. Hirurak ere, goitik ibili dira puntuazioetan, eta 5. eta 6. postuetan bukatu dute, bakoitzak bere taldean. Araiztegik gainera, puntuaziorik onena lortu zuen Mutrikuko saioan.
Aipatzekoa da sailkapen fase horretan aritu diren hiru gabiriarren kasua ere; Gorka Maizek (A taldean), Endika Igartzabalek eta Aratz Igartzabalek (B taldean), hirurek gainditu dute kanporaketa, eta Gipuzkoako txapelketan izango dira.
Haiekin batera sailkatu dira Iban Urdangarin ataundarra, Odei Lopez legorretarra eta Maialen Akizu urretxuarra; azken hau izan da B taldeko 17. sailkatua, eta berak jarri du B taldeko langa, 308 punturekin.
Iban Urdangarin eta Eneko Araiztegi // GBE
Txanponaren beste aldean daude sailkatzerik lortu ez duten eskualdeko sei bertsolariak. Horietatik lau, oso gertu ibili dira, eta apenas bost puntuko aldeagatik gelditu dira txapelketaren atarian. Antton Fernandez (302), Beñat Torres (300,5), German Urteaga (299,5) eta Mikel Iturriotzen (298,5) kasua da, denak ere 18. eta 22. postuen artean bukatu dute, A taldean (langa 304,5 puntuan zegoen). Talde berean, Maddi Aiestaran (268,5) eta B taldean Ane Beloki (292,5) ere kanpoan gelditu dira.
Sailkapen fase honetan aurrera egin duten bertsolariei, aurreko ediziotik zuzenean sailkatutako beste 14 bertsolari gehituko zaizkie. Gipuzkoako Bertsolari Txapelketa udazkenean hasiko da, eta Bertsozale Elkarteak ekainean emango ditu haren inguruko xehetasun gehiago.
Sailkatutako goierritarrak:
A Taldea Puntuak
5. Amaia Iturriotz …………….. 324
6. Eneko Araiztegi ……………. 319
12. Iban Urdangarin …………. 312,5
13. Gorka Maiz …………………. 310
16. Odei Lopez …………………. 304,5B Taldea Puntuak
6. Mikel Tapia ………………….. 328
11. Endika Igartzabal ………… 315,5
12. Aratz Igartzabal ………….. 315
17. Maialen Akizu …………….. 308
