Bi enpresaren elkarteak eraikiko du Zaldibiako udaletxe berria
Udalbatzak bi eskaintzaren artean «txosten tekniko onena» aurkeztu duena aukeratu du. Uztailean hasteko baldintza du, eta 14 hilabetean bukatzea eskaini du
Zaldibiak udaletxe berria izan dezan, azken pausoa lehengo ostiralean eman zuen udalak: eraikitzailea izendatzea. Bi eskaintza zeuzkan mahai gainean, eta bietatik lehiaketako pleguetan puntuaketa onena lortu duena aukeratu dute.
Indenort eta Proviser enpresek osatutako aldi baterako enpresa elkarteak lortu du esleipena. Gasteizkoa da lehena, eta Naiarakoa (Errioxa, Espainia) bigarrena. Astebeteko epea dauka udalarekin harremanetan jarri eta kontratua sinatzeko.
Udaletxe berria gaur egungo herriko etxearen aldameneko orubean altxatuko dute. Eraikuntza uztailean hastea da baldintzetako bat. Ondoren, eraikitzaile esleipendunak 14 hilabetean bukatzeko konpromisoa eman du (15 hileko epea zegoen oinarrietan).
Arlo ekonomikoa eta teknikoa baloratu ditu epaimahaiak. «Ekonomikoki, geneuzkan bi eskaintzen aldea oso txikia zen, 13.000 eurokoa, 1,5 milioiko proiektu baterako. Azkenean, memoria tekniko onena zeukana aukeratu da», azaldu du jarduneko alkateorde eta alkategai hautetsi Eztitxu Mujikak.
Proiektua, birmoldatua
Udaletxearen proiektuaren esleipen aurrekontua 1,5 milioikoa zen, eta lehiaketa irabazi duen enpresa elkarteak zertxobait jaitsi duen arren (bi mila euro inguru), lizitazio prezioa antzekoa geldituko da, behin kontratua gauzatutakoan. «Aurrekontua oso doitua» zela dio udalak.
Eraikuntza-lehiaketaren lehen deialdia hutsik geratu zen, udalak ez zuelako proposamenik jaso, eta berraztertu egin behar izan dute proiektua eta baldintza-sorta. Hala, eraikinaren neurriak txikitu dituzte, 19,5 metroko aldeko karratua izatetik, 18 metroko aldeetara murriztuta.
Eraikinaren apaindura eta osagarri zenbait ere ezabatu dituzte, prezioa jaisteko —aurrerago osatzekotan gelditu dira—, baita elementu batzuen nolakotasuna ere.
Obra uztailean hasiko dela aurreikusita, dena ondo joanda, 2020ko abendurako udaletxe berria izango du Zaldibiak.
