Ordizia Punch Boxing Taldeak erakustaldia egingo du Beti Alai pilotalekuan
Boxeo gau handiaren aurretik egingo dute entrenamendu saioa eta edonork ikusi ahalko du.
Boxeoaren zaletuek Ordiziako Beti Alai pilotalekuan dute hitzordua ostiralean. Boxeo gauak beste behin ere kirol horretan punta-puntan dabiltzan kirolariak ekarriko ditu baina herriko taldeak, Ordizia Punch Boxing klubeko neska-mutilek ere jarriko dute aletxo bat.
Boxeo ikuskizun handia 22:00etatik aurrera izango bada ere, beste behin ere erakustaldi polita egingo dute Ordizia Punch Boxing taldekoek. Beti Alai pilotalekua, herritar guztientzat irekita egongo da ostiralean, 19:00etatik aurrera, Ordiziako boxeolarien entrenamendu saioa ikusteko. Eta animatzen dena, eskuzorroak jantzi eta teknika pixka bat praktikatzeko aukera ere izango du haien entrenatzaile Anartz Azkarragaren gidaritzapean.
Boxeoan hasi nahi duten pertsona haientzat dago zuzenduta taldea. Une honetan Urdaneta eskolan entrenatzen dute. Taldearen lana ezagutu nahi duenak Beti Alai pilotalekuan izango du aukera.
