Lazkaon zientziari buruzko zikloa antolatuta ekin dio Lemniskatak udazkenari
Bi hitzalditan lehena gaur egingo du Goiekiko Iker Galparsorok. Iñaki Mezquitaren 'Bizi ezkutua' argazki erakusketa eta kaiera atera dute. Urrian Ordizian eta azaroan Beasainen jarraituko du
Iñaki Mezquita argazkilariaren lanak ikusgai izango dira Lazkaon. // Argazkia: Iñaki Mezquita Uzta biltzeko garaia da naturan udazkena. Baita zientzian ere. Lemniskata Goierriko zientzia sareak Lazkaon lehenbiziko aldiz zikloa antolatu du; gaur hasiko da Lazkao Zientzia egitaraua. Urrian Ordizientzia-rekin Ordizian izango dira, eta azaroan Beasainera Zientziaroa iritsiko da.
Lehen ere erakusketak jarri izan ditu Lemniskatak Lazkaon, baina ziklo moduko egitaraua estreinakoz antolatu du. «Leku gehiagotara iristea da Lemniskataren nahia. Lazkaon ere eske ari zitzaizkigun, eta lehen aldiz egingo dugu zientziari buruzko zikloa. Arrakasta baldin badu, segiko dugu beste urteetan», azaldu du Lemniskatako kide eta San Benito ikastolako irakasle Jose Luis Etxezarretak.
Bi hitzaldik eta argazki erakusketa batek osatuko dute Lazkao Zientzia, gaurtik abenduaren 20ra. Horiez gain, ekimen orokorrak dituzte: Lemniskata Kaieretako liburua, eta VI. Lemniskata Matematika Argazki Lehiaketa, urte bukaerara arteko epearekin.
Iker Galparsoro hizlari
Lazkao Zientzia hasteko, Goieki garapen agentziako Iker Galparsorok Bultzatu etorkizuna, egin Goierri hitzaldia egingo du, gaur, Goierri Valley industria aliantzan oinarrituta.
Bigarren hitzaldia Arantza Aranburu geologo olaberritarrarena izango da. Udan Pakistanen lanean izan da. Atapuercako gune arkeologikoan datazioak egiten ere aritzen da. «Hortik dator izenburua, baina denetarik jorratu duenez, bere esku utzi dugu hitzaldiaren norabidea».
Lemniskata Kaierak sortako 3. liburua urriaren 15ean aterako dute. CAFen mendeurrenari eta Goierriko arkitekto historikoei eskainitakoen ondotik, Iñaki Mezquitak Bizi ezkutua. Goierriko kronika ikusezina lana ondu du. Intsektuak, armiarmak, lepidopteroak… argazkitan jaso ditu. Argazki erakusketa atonduko dute, 120 irudikoa.
Egitaraua:
· Gaur. Iker Galparsororen hitzaldia. ‘Bultzatu etorkizuna, egin Goierri’. Kultur etxea, 19:00.
· Urriak 25. Arantza Aranburu geologoaren hitzaldia, ‘Euskal Herritik Pakistanera, Atapurcatik igaroz’. Kultur etxea, 19:00.
· Abenduak 9-20. Iñaki Mezquitaren argazki erakusketa, ‘Bizi ezkutua’. Kultur etxeko aretoan.
· Besterik. Lemniskata Kaierak 3. zkia, ‘Bizi ezkutua. Goierriko kronika ikusezina’ liburua salgai (3 euro), urriaren 15etik. VI. Matematika Argazki Lehiaketa. Lanak abenduaren 31 arte.
