Easo Emakume koruak hasiera emango dio bihar Azaroan Musika zikloari
Bederatzi kontzertu hartuko ditu Azaroan Musika zikloak. Bihar hasi eta astebururo musika eskaintza egongo da. Emanaldiak parrokian, Txillida Lantokian, kalean eta Gaztetxean izango dira
Azaroan Musika zikloa hasiko da bihar. Bederatzi emanaldi hartuko ditu. Parrokian, kalean, Txillida Lantokian eta Gaztetxean egingo dituzten kontzertuak jaso ditu Azaroan Musika zikloaren egitarauak. Easo Emakumeen Abesbatzak ekingo dio zikloari bihar bertan parrokian.
Easo abesbatzaren barruan sortu zuten seigarren korua da emakumeek osatzen dutena. 2006an sortu eta, gaur-gaurkoz, 30 andrek osatzen dute. Gehienek bost urtetik gorako eskarmentua daukate Araoz Gazte Abesbatzatik baitatoz.
Donostiako Hamabostaldiaren barruan egindako hainbat operatan parte hartu du koruak sortu zuten urtetik bertatik. Zarzuelatan eta bestelako programa sinfoniko koraletan ere aritutakoak dira. Euskadiko Orkestra Sinfonikoarekin, Frantziako Tolosako Kapitolioko Orkestra Nazionalarekin eta Bilboko Orkestra Sinfonikoarekin kantatu dute. Bestelako formatuak ere lantzen ditu Gorka Mirandak zuzendutako abesbatzak, hala nola kamera musika zein folk-a.
Easo koruko emakume ahotsekin dute legazpiarrek Azaroan Musika Zikloarekin lehenengo hitzordua da. Urtetik urtera oparoagoa da udazkeneko zikloak eskaintzen duena.
Azaroan Musika 2019
· Bihar. Easo Emakume Abesbatza, 19:30ean, parrokian. Santikutz abesbatzak sustatutako kontzertua da.
· Azaroak 9, larunbata. Altsasuko Erkudengo Ama Abesbatza, 20:00etan, parrokian. Santikutz abesbatzak sustatutako kontzertua da.
· Azaroak 17, igandea. Ispirit, gospel eta soul emanaldia, 19:00etan, parrokian.
· Azaroak 21, osteguna. Doinua musika eskolako ikasleen Santa Zezilia kalejira, Legazpi erdigunean, 17:30ean. Amaieran txokolatea banatuko dute Azokan.
· Azaroak 22, ostirala. Elbereth (Legazpi), Full Division (Toledo) eta Torheit (Iparralde), 22:00etan, Gaztetxean.
· Azaroak 23, larunbata. Goiz Deia txistulari taldearen kalejira eta jarraian Santa Zezilia kontzertua: Santikutz abesbatza, Goiz Deia, Alaitasuna errondaila eta Legazpiko Musika Banda, 19:30ean, parrokian.
· Azaroak 24, igandea. Edurne Zabalo (klarinetea) eta Gorka Hermosa (akordeoia), 13:00etan, Txillida lantokian.
· Azaroak 30, larunbata. Subeltza Eguna, Gaztetxean.
