Gazte Festak ospatuko dituzte Legorretan ostegunetik larunbatera
Legorretako Gazte Festak 21. aldiz ospatuko dituzte. Ostegunean txapel-karropotearekin hasiko dute egitaraua. Mus txapelketa ostiralean jokatuko dute eta aurretik izena ematea komeni da
Gazte Festak ospatuko dituzte hurrengo egunetan Legorretan, Gazte Piku Gazte Asanbladako kideek antolatuta. Aurten 21 urte beteko dira festak antolatzen hasi zirela. Bihar arratsaldean hasi eta larunbatera arte luzatuko dira.
Txapel-karropotearekin emango diote hasiera aurtengo Gazte Festei legorretarrek. 19:00etan izango da hori eta txapela edo bakoitzak aukeratutako jantzita eramatera gonbidatu dituzte antolatzaileek herritar guztiak. Poteoan, elkartasun keinu bat egingo dute. Altsasuko gazteei babesa adierazteko taldeko argazkia aterako baitute. Iaz ere egin zuten Altsasukoen aldeko argazkia. 21:00etan afari autogestionatua egingo dute herriko plazan jarri duten karpan, eta 23:00etatik aurrera Dena, Estarlus eta Brea taldeen kontzertua izango da.
Ostiralean, buruhandiek hartuko dituzte kaleak, 17:30etik aurrera Gauean, berriz, mus txapelketa egingo dute karpan, 22:30etik aurrera. Lau erregetan jokatuko dute eta ordu erdi lehenago eman ahalko da izena (10 euro bikoteko). Sariak ere egongo dira lehen bi sailkatuentzat.
Finalaren ordez, musika
Larunbatean, Kuadrillen Arteko Jolasen finala jokatzea aurreikusita zuten, baina bertan behera gelditu da eta horren partez, poteo musikatua egingo dute. 14:30ean herri bazkaria egingo dute. 19:00etan Itsasondoko batukada eta gauean Arekan, Galtzagorriak eta The Ladj’s taldeen kontzertua izango dira.
