Musikaren uzta biltzera Lazkaon
Udazkeneko II. Musika Zikloa bihar hasiko da, udalak eta Kantakak antolatua. Koruen lau kantaldi izango dira denera. Mozarten 'Koroatze meza' abestuko dute lazkaotarrek
Lazkaon Udazkeneko Musika Zikloa izango da, aurten ere. Iazko estreinako egitarauak emanarekin asebeteta geratu ziren udaleko eta Kantaka abesbatzako antolatzaileak; bihar ekingo diote bigarrenari. Lau astean, asteko kontzertu bana entzun ahalko da, denak ahots taldeenak.
Harribitxi politak ditu egitarauak. Lotailua ahotsa den arren, erregistro nahiz genero ugari izango ditu. «Zikloak herriari izugarrizko aukera ematen dio musika ezberdina entzuteko. Aldi berean, baita musikaren espezialitate, modalitate eta era ugari ezagutzeko eta gozatzekoa ere. Baita herrian musika babesteko ere. Musika maitatzen duen herria, herri zoriontsua izan ohi da», azaldu du Kantakako lehendakari Belen Maizak.
Bihar hasiko da, Lituaniako Vilnius koruarekin. Zikloko lehen bi kontzertuak Arerian dira, eta hor sarrera 5 euro kobratuko dute. Azken bi emankizunak San Migel elizan kantatuko dituzte, eta han sarrera doan da.
Mozarten meza, izarra
Iazko zikloan Vivaldiren Gloria ikusgarri plazaratu zuten bezala, aurten Mozarten Koroatze meza landu du Kantaka abesbatzak. Azaroaren 17an abestuko dute, elizan. Wolfgang Amadeus Mozartek (Salzburgo, 1756 Viena, 1791) 1779ko martxoko Pazkoa festarako idatzi zuen. Bere 16. meza da, eta artistaren helduaroko gorenetakoa. Sorta klasizistakoa da, arte sakroa.
Kantakarekin batera —ohi bezala Javier Alberdik zuzenduta—, orkestra batek eta lau bakarlarik parte hartuko dute Koroatze meza-n: Clara Mendizabal sopranoak, Josu Ieregi baxuak, Iñigo Vilas tenoreak eta Paula Iragorri kontraltuak.
«Niretzat aukera ezin hobea da, musika zoragarria baita. Eta nire paperak, bereziki, norbera bete egiten du», aurreratu du Clara Mendizabal sopranoak.
Udazkeneko zikloa
· Bihar. Bel Canto Choir Vilnius abesbatza (Lituania). Arerian, 20:15ean. Sarrera: 5 euro.
· Azaroak 9. Easo gazte abesbatza (Donostia). Areria, 19:30. 5€.
· Azaroak 17. Kantaka (Lazkao), Mozarten ‘Koroatze meza’. San Migel eliza, 19:30. Doan.
· Azaroak 24. Hodeiertz (Tolosa), ‘Kristalezko bihotza’ ipuin musikatua. Eliza, 19:30. Doan.
