Kontrol batetik ihes egindako gidaria atxilotu dute Idiazabalen
Altsasun alkoholemia kontrol batetik ihes egin eta Etzegaraten barrena jarraitu zuen Ertzaintzak. Atxilotuak ez zuen gidabaimenik eta positibo eman zuen drogen testean.
Argazkia: Ertzaintza 
Ertzaintzak 25 urteko gizonezko bat atxilotu du Idiazabalen, kontrol batetik ihes egin eta gero. Gertakariak atzo izan ziren, 15:00ak aldera. Foru Poliziak Altsasun jarritako alkoholemia kontrol batetik ihes egin zuen auto gidariak, eta atzetik jarraitu zioten. Hainbat kilometrotan segika jardun eta gero, gidariak istripua izan zuen N-1 errepidean, Idiazabal parean. Ertzaintzarekin elkarlanean, bertan atxilotu zuten. Atzeman zuten momentuan, ez zeraman gidabaimenik, eta drogen testean positibo eman zuen. Gainera, bere objektuen artean marihuana aurkitu zioten. Bi delituengatik ikerketa zabaldu dute, eta isun administratiboa jarri diote, soinean drogak eramateagatik.
Eitb.eus-ek zabaldutako irudiak:
