Euskal Herriko Gazte Sozialisten Topagunea Legazpin aurkeztuko dute, otsailaren 9an
Ikasle Abertzaleek eta Gazte Koordinadora Sozialistak elkarlanean antolatutako jaiaren bigarren ekitaldia Legution egingo dute, apirilaren 9tik 13ra. Legazpin aurkeztuko dute ekimena, eta Benito Lertxundik kontzertua egingo du.
Euskal Herriko Gazte Sozialisten Topagunea iaz aurkeztu zuten, Azpeitian. // Uztarria 
Euskal Herriko Gazte Sozialisten Topagunea aurkezteko nazio mailako aurkezpena egingo dute, otsailaren 9an, Legazpin. Ikasle Abertzaleak eta Gazte Koordinadora Sozialista taldeek elkarlanean antolatutako jaiaren bigarren edizioa egingo dute aurten. Apirilaren 9tik 13ra izango da, Legution (Araba). Data hori iritsi baino bi hilabete lehenago, Legazpin aurkeztuko dute egitasmoa, hitzaldi batekin eta Benito Lertxundiren kontzertuarekin.
Euskal Herriko Gazte Sozialiston Topagunea “lana erdigunean kokatzen duen ekimena” dela diote antolatzaileek. Aurten, Legution berriki okupatu duten Desjabetuon Hotela “ildo sozialistaren mesedetara egokitzeko” baliatuko dute. Horretarako, “gaitasun ezberdinak garatu, hitzaldi eta tailerren bidez formakuntza jaso eta komunitatea indartzeko aisi ekintza zabal bat” prestatuko dute. Topagunearekin, “antolakuntza eredu berri bat” irudikatu nahi dute, “kontsumo artikulu bat izatetik urrun, lan eraginkorraren abagune” izango dena, beti ere, “Euskal Herriko eskualde ezberdinak indartzeko” asmoz. Topagunerako bonoak, bihartik aurrera jarriko dituzte salgai, Euskal Herriko salmenta puntu ezberdinetan.
Arratsaldeko osoko egitaraua.
Legazpiko ekitaldiari dagokionean, arratsalde osorako egitaraua antolatu dute, otsailaren 9rako. Aurrena, antolakuntza eredu berriaren eta aurtengo ekimenaren inguruko hitzaldia egingo dute, “topaguneak ildo sozialistaren baitan betetzen duen funtzioa azaltzeko”. Ondoren, Benito Lertxundi kantari oriotarraren kontzertua izango da, Urbeltz pilotalekuan. Kontzerturako sarrerak Legazpiko eta Urretxuko hainbat tabernatan eta entradium.com atarian jarri dituzte salgai.
Otsailak 9
· 16:30. Hitzaldia. Topagunea: Antolakuntza eredu berria eta aurtengo ekimenaren hurbilpen bat. Urbeltzeko aterpeetan.
· 19:00. Kontzertua: Benito Lertxundi. Sarrerak salgai Karibe Zaharra, Gurrutxaga eta Katilu tabernetan eta Internet bidez.
