Futbol 7 txapelketan izena emateko epea apirilaren 5era arte
Izen-ematea mantso badoa ere, gutxienez zortzi talde apuntatzea espero dute antolatzaileek. Txapelketa maiatzetik uztailera bitartean jokatuko litzateke.
Arauetan jaso dutenez, Legazpiko Futbol Zazpi txapelketa herrikoia aurrera eramateko, gutxienez zortzi partaide izan behar dira izena emanda. Legazpiko Gazteak kirol elkarteko antolatzaileek sare sozialen bidez zabaldu duten mezuan diote izen-ematea oso mantso doala aurten, eta horretarako epea apirilaren 5ean amaitzen dela gogoratu dute. Herriko futbolariak animatu nahi dituzte parte hartzera, aurten ere egin nahi dutelako txapelketa, hamahirugarrena izango dena.
Ohi bezala, lehenik taldeen izenak eman behar dira, eta hurrengo egunetik, hau da, apirilaren 6etik maiatzaren 3ra arte, jokalarien izenak. Jokalari bakoitzak 16 euro ordaindu beharko ditu. Taldeak 10 eta 16 jokalari bitartekoak izango dira, eta jokalariek 16 urte izan behar dituzte gutxienez edo urte honetan bete. Gizonezkoenak, emakumezkoenak, eta talde mistoak sor daitezke. Talde bakoitzean, gehienez, legazpiarrak ez diren bi jokalarik joka dezakete. Izen-emateak www.futbolzazpilegazpi.com atarian egin behar dira.
Finala, uztailaren 4an
Izena ematen duten talde guztiekin bilera egingo dute maiatzaren 10ean, 19:00etan kultur etxean. Izena emandako taldeen kopuruaren arabera, talde multzoak egingo dira eta multzo bakoitzean ligaxka eran jokatuko diren partidak zehaztuko dira; larunbat eta igandeetan jokatuko dira, ohi bezala, Bikuña zelaian. Bigarren fasean partidak kanporaketa moduan jokatuko dira, eta norgehiagokak zozketa bidez erabakiko dira.
Azken urteetan bezala, festa handi batekin amaituko da Futbol Zazpi txapelketa. Finalak eta 3. eta 4. postuak erabakitzeko partidak uztailaren 4an jokatuko dira. Ondoren, bazkaria egingo dute Azokan, eta bazkarian zehar sariak banatuko dituzte: txapeldunari, bigarrenari eta hirugarrenari, Pitxixiari eta Aiztonagako Tigrea saria. Iazko txapelduna Mercenarios izan zen, Pitxitxia Gorka Guridi eta Aizkonagako Tigrea Iñaki Pagola.
