Koronabirusa: Saguzarretatik gizakietara
Elhuyar Fundazioak eskainita, 'Covid 19aren izurria argitzen' bideo sortako atal bana eskainiko du Goierriko Hitzak egunero. Gaitzaren inguruko informazio zientifiko eta zehatza ematen saiatuko dira.
Elhuyar Zientziako lantaldeak koronabirusaren inguruko argibideak emateko bederatzi bideo-pilulako sorta bat prestatu du, gaur hasi eta egunero-egunero argitaratuko dena. Ana Galarraga Aiestaran Elhuyarreko kideak minutu bateko bideoetan hainbat gai landu ditu, hala nola, birusaren jatorria, komunitate zientifikoaren ahalegina, adinaren araberako eragina, emakumeak zaurgarriago izatea, edota tratamenduen inguruan.
Elhuyarren sare sozialetan eta zientzia.eus atarian zabalduko da edukia, eta horrezaz gain, euskarazko 30 hedabide baino gehiagotan ere hedatuko da edukia -tartean Goierriko Hitza-, webgune, telebista eta irrati-emisioen bidez.
Koronabirusak sortu duen egoera berezi honetan, herritarrei euskarazko informazio irizpidedun eta kalitatezkoa ematea ezinbestekoa da Elhuyarren ustez, eta lan horrek hedadura handiagoa izan dezan, euskarazko komunikabideekin elkarlana sendotzeko abagunea aprobetxatu nahi izan du, eduki hori guztion eskura jarriz.
Bideoak euskarazko 30 hedabidetan:
Honako hedabideek zabalduko dituzte bideoak: Aiaraldea gaur, Aikor, Aiurri, Alea, Anboto, Antxeta irratia, Argia, Ataria, Barren, Berria, Eta kitto, Gaztezulo, Geuria, Goiena, Goierri irrati telebista, Goierriko Hitza, Guaixe, Gure irratia, Hamaika telebista, Hiruka, Irulegiko irratia, Lea-Artibai eta Mutrikuko Hitza, Naiz, Noaua, Pil-pilean, Ttap, Ttipi-ttapa, Txintxarri, Urola Kostako Hitza, Xiberoko Botza, eta Zientzia.eus.
