Legorretako Azintzio festei keinu egiteko egitarau berezia prestatu dute
Koronabirusa dela eta aurten ezin izango dituzte Azintzio jaiak ospatu Legorretan. Hala ere, leiho eta balkoiak apaindu eta festa alternatiboak egiteko egitaraua prestatu dute. Bihar botako dute suziria.
Bihar botako dute jaien hasierako suziria, eta herritarrek Instagram bidez jarraitu ahal izango dute. // A. Vierbücher
Aurten, koronabirusa dela eta, ezingo dira Legorretako festak ohiko moduan egin, baina festa alternatiboak ospatuko dituzte eta herritarrak lanean aritu dira, hurrengo egunetarako egitaraua prestatzeko.
Azken bi hilabeteotan hain garrantzitsuak bihurtu diren leihoetatik eta balkoietatik ospatuko dituzte Azintzio festak, horregatik, balkoiak eta leihoak apaintzeko deia egin dute. Ikurrinak eta zapiak kioskoan salgai jarriko dituzte.
Egitarauari dagokionez, bihar, asteazkena, suziria jaurtiko dute, 18:30ean. Instagramen bidez egin ahalko da jarraipena. 19:00etan berriz, herritarren argazkiekin egindako ikus-entzunezkoa ikusi ahalko da. Larunbatean berriz, 21:00etan ikus-entzunezkoan jarritako abestia kantatuko dute balkoietatik.
Lehiaketa
Bi lehiaketa ere antolatu dituzte. Bata, ikus-entzunezkoan agertzen diren argazkiena, eta bestea, Play Back lehiaketa izango da. Bigarrenean, asteazkenera arte parte hartu ahalko da. Herriko produktuekin osatutako saskiak izango dira sariak.
