Loinatz jaietako ekintzak Internetez eta telebistaz jarraitu beharko dira
Ohi baino ekintza gutxiago egongo dira, eta ezingo da ikustera bertaratu
Mariren jaitsiera Beasaindar askok urte osoa pasa dute egun honen zain, baina Loinatz jaiak ezingo dira ohiko legez ospatu. Ekintza gutxiago egongo dira eta online bidez jarraitu beharko dira. Emanaldi guztiak Beasaingo Udalaren youtubeko kanalaren edo Goierri Telebistaren bidez emitituko dira.
Mariren jaitsiera izango da ekintzetako bat. Ez da aurrez aurreko ekintzarik egongo baina Loinatz Abesbatzako kideek eta Aurtzaka dantza taldekoek aurrez grabatutako bideo bat eskainiko dute sarean. 22:30ean publikatuko da, festei hasiera emango litzaiokeen ordu berean. Aurtzaka dantza taldekoek aurten ere hiru soka dantzak egingo dituzte. Kasu honetan ere formula bera erabili dute: dantzari bakoitzak bere kabuz egin du dantza eta ordenagailu bidez lotu dituzte. Dantza taldekoek egun eta orduak errespetatu nahi zituzten egindako lana herriari erakusterakoan, baina ez dute lortu. Ezin izan dute zehaztu noiz argitaratuko dituzten sokadantzak.
Asteburu musikatua
Musika izango da festetako protagonistetako bat. Olatz Salbadorrek kontzertua eskainiko du gaur, 21:00etan. Igartzatik arituko da, baina Goierri Telebistaren bidez entzun beharko da. Ezin da bertaratu. Maiatzaren 31n, Arrano elkarteak antolatutako bertso saioa egingo dute, 12:30ean. Goierri Telebistak eskainiko du. Iñaki Apalategi beasaindarrak alboan izango ditu Andoni Egaña, Nerea Ibartzabal eta Agin Laburu. Igor Eguren izango da gai-jartzailea.
Dianak egongo dira, goizero, asteburuan zehar. Txistulariak eta zanpantzarrak hiru taldetan banatuko dira eta 09:15etik aurrera, egunari hasiera emango diote. Astelehenean, berriz, txistulariak soilik irtengo dira herri erdigunean. San Martinen estatuaren parean San Martin doinuak eta ezpata dantza joko dituzte, nahiz eta aurtengoan dantzarik ez den egongo.
Txilibutxof aisialdi taldeak ere gaztetxoenentzako jolasak eta tailerrak prestatu ditu, kasu honetan ere etxetik egiteko modukoak. Halere, ez dira ordenagailu bidez egitekoak izango.
| Loinatz jaietako egitaraua: | |
| Gaur: | |
| 21: 00. | Olatz Salbadorren kontzertua. |
| 22:30. | Mariren jaitsiera Aurtzaka dantza taldearen eta Loinatz abesbatzaren eskutik. |
| Bihar eta etzi: | |
| 9:15. | Zanpantzarrak eta txistulariak herrigunean zehar. |
| Etzidamu: | |
| 9:15 | Txistularien diana. |
| Maiatzak 31, igandea: | |
| 12:30. | Bertso saioa. |
| Oharra: | Ekintzak udalaren youtubeko kanalaren edo Goierri Telebistaren bidez jarraitu behar dira. |
