Ikastola egun berezia ospatuko du aurten Legazpiko Haztegik
Ekainaren 5ean ziren festa eguna egitekoak Haztegikoak, baina aurtengoa ez da betikoa izango, eta bideo lehiaketa baten bidez ospatuko dute.
Legazpiko Haztegik ez dio koronabirusari utziko aurtengo Ikastola eguna zapuzten. Ekainaren 5ean zen ospatzekoa Haztegiren Ikastola eguna, eta aurten urteroko festarik ezin badute egin ere, aurkitu dute ospakizunarekin aurrera egiteko modua. Hala, gurasoei, ikasleei, irakasleei eta langileei zuzendutako bideo lehiaketa bat jarri dute martxan.
Bideoaren gaia aurtengo ikastola eguna da, eta bertsoa, dantza, musika, magia, ipuinak… denetik jaso daiteke bertan, gehienez 3 minutuko iraupenarekin. Lanak ekainaren 12ko 12:00ak baino lehen bidali behar dira ikastolaeguna2020@haztegiikastola.eus helbidera. Epaimahaia Artezkaritza kontseilukideek osatuko dute, eta saria Chromebook bat izango da.
Antolatzaileek diotenez, “Ez da aurreko urteetakoa bezalakoa baina, aurten ere erakutsiko dugu herrian Haztegi ikastolak badakiela bere eguna ospatzen”.
