Etzegaraten noranzko bat itxi behar izan dute, kamioi bat irauli eta gero
Goizeko bostak aldera gertatu da ezbeharra N-1 errepidean, Irungo norabidean. Gidaria zauri arinekin eraman dute Zumarragako ospitalera. Trafikoa Urtsuarandik bideratzen ari dira.
Trafiko ezbehar bat dela eta, Etzegaraten hainbat orduz itxita dago N-1 errepidea, Irungo noranzkoan. Goizeko 05:10ak aldera, kamioi bat errepidetik atera, irauli eta errepidean gurutzatuta gelditu da eta zeraman karga erori egin da galtzada gainera. Gidariak zauri arinak besterik ez ditu izan, eta Zumarragako ospitalera eraman dute.
Errepidea itxi egin behar izan dute Irungo noranzkoan, eta zirkulazioa Urtsuaran auzotik ari dira bideratzen. Kilometrotik gorako auto-ilarak sortu dira.
