Udal igerilekua berritzeko proiektua aho batez onartu dute
Lanak urrian hasi eta martxoan amaitzea aurreikusi dute. Horrez gain, herriko 400 puntutako argiteria Led sistemara egokitzeko proiektua ere onartu dute
Astelehenean egindako batzarrean bi proiektu onartu zituen aho batez Ormaiztegiko Udalak. Alde batetik, udal igerilekua berrituko dute urritik hasi eta martxora bitartean, 290.000 euroko aurrekontuarekin. Eta bestetik, Led argiteria sistema jarriko dute herriko hainbat faroletan.
Behin betiko prozesua aste honetan jarriko dute martxan, eta bost hilabeteko exekuzioa izango dute igerilekuko lanek. Urrian hasi eta martxoan amaitzea aurreikusi dute. Jon Enrique Ormaiztegiko alkateak azaldu du «igerilekuak dituen arazo tekniko desberdinak konpontzeko» egingo dituztela obrak batez ere: «Filtrazioak ditu eta ura alde batetik ebakuatzen du soilik». Horretaz aparte, sakonera kenduko zaio igerilekuari «ura eta elektrizitatea aurrezteko», eta haurrek jolasteko eremua egokituko dute: «50-60 metro karratukoa izango da txikientzakoa, 40 zentimetroko sakonerarekin eta itxita». Sarrera berriak eraikiko dituzte mugikortasun urria dutenentzako, eta uretan ere aulki bat jarriko dute. Datorren urteko uda denboraldirako prest egongo dela jakinarazi du Enrique alkateak.
Led sistema
Udal igerilekuaren proiektuaz gain, herriko argiteria aldatzeko plana ere onartu dute. «400 puntu inguru» moldatuko dituzte, eta horretarako 532.803 euroko aurrekontua dute. Sei hilabeteko prozesua izango da, urrian edo azaroan hasi eta apirila inguruan amaituko dutena.
Hamabi urteko epea eman diote proiektua egingo duen enpresari, eta enpresaren esku geratuko da urte horietan argiteriaren kudeaketa: «Gastu energetikoa ere haiek kudeatuko dute». Alkateak azaldu duenaren arabera, «%40-50 inguruko aurrezkiak» izango dituzte Led sistema berri horrekin.
Lanak hastearekin batera eta sistema martxan jarri baino lehen informazio saioak eskainiko ditu Ormaiztegiko Udalak herritarrentzat, sistemaren funtzionamenduari eta argiztapen berriari buruzko informazioa zabaltzeko. Aurrerantzean emango dute saioen berri.
