Ordiziako Udalak azaldu du "kalea ixteko agindua" eman zutela edukiera gainditu zen unean bertan
Sare sozialetan zabaldu den irudia "une konkretu eta zehatz batean" hartutakoa dela eta kalea berehala itxi zutela dio udalak. Gainontzean, "ordiziarren jarrera txalogarria" izan dela azaldu dute.
Ordiziako kuadrillen argazkia bolo-bolo zabaldu da sarean.
Izan ere, Santa Ana jaiak bertan behera uzteko erabakia hartu zuen udalak ekainaren 24an, eta udalean ordezkaritza duten alderdi guztiek, arduraz jokatzeko deia egin zieten herritarrei. Herriko ostalariekin bildu eta gero, hainbat neurri adostu zituzten, eta tabernak, goizaldeko 04:30ean itxi ordez, 01:00etan ixteko erabakia hartu zuten. Horrez gain, egun hauetan udaltzainen zaintza zerbitzua indartu egin dela azaldu dute, tabernen itxiera ordura arte lan egiteko. “Zaintza lanak egin dituzte, bai musukoaren erabilera, aforoa eta segurtasun distantziak betetzeko”.
Udalak azpimarratu du “orokorrean, ordiziarren jarrera txalogarria” izan dela, egindako deialdiari erantzunez, ez baitituzte herriko jaiak ospatu. Aurrerantzean ere, “arduraz” jokatzeko eta “osasun eta segurtasun neurriak” errespetatzeko deia egin dute.
