Igartubeiti Baserri Museoak Sagardo Astea ospatuko du urriaren 10etik 12ra
Baserriko dolarea martxan ikusteko aukera izango dute parte hartzaileek. Plazak mugatuak dira eta izena ematea beharrezkoa da.
Ezkioko Igartubeiti Baserri Museoak urriaren 10etik 12ra bitartean ospatuko du aurten Sagardo Astea. Dolarea martxan ikusteko aukera izango da, eta Karmakros antzerki taldearen emanaldia ere egongo da ikusgai.
Urriaren 10ean, 11n eta 12an egingo dituzte Sagardo Asteko ekintzak. 12:00etan dolarea martxan jarri eta duela 500 urte erabiltzen zen teknikarekin gozatzeko aukera izango dute parte hartzaileek hiru egun horietan. Bestalde, baserrian bertan bizi izandako pertsonaien inguruko antzezlana prestatu dute. Kortaberria familiari buruzko lana izango da, XVII. mende hasieran baserrian bizi izan zena. Urretxu-Zumarragako Karmakros antzerki taldeak eskainiko du. Egunero hiru saio egingo dituzte: 10:15ean, 11:00etan eta 13:00etan.
Plazak mugatuak izango dira eta izena eman behar dute interesdunek, museora telefonoz deituta edo posta elektronikora idatzita. Autobus zerbitzurik ez da egongo.
