'Streaming' bidezko jaialdia antolatu dute larunbaterako
La Perra Blanco, Joseba Irazoki, Joao Tomba eta Johnny Casinok joko dute, 22:00etan. Zarraparraz Live Streaming Stage taldean izena eman behar da
Zarraparraz kolektiboak eta Urretxuko Motz tabernak streaming bidez ikusi ahal izango den musika jaialdia antolatu dute larunbat honetarako. Egoerak behartuta, parte hartuko duten musikariek beraien etxetik eskainiko dituzte emanaldiak eta ikusleek ere etxetik ikusteko aukera izango dute, Facebook plataforman eta debalde. La Perra Blanco (Andaluzia), Joseba Irazoki (Euskal Herria), Joao Tomba (Galizia) eta Johnny Casino (Australia) musikariek joko dute.
Jaialdi honetaz gozatu nahi dutenek Facebookeko Zarraparraz Live Streaming Stage (https://www.facebook.com/groups/2513650558846582) taldean izena eman behar dute. Jaialdia 22:00etan hasiko da.
La Perra Blanco taldeak rockabilly musika jotzen du. Taldeko burua Alba Blanco gaztea da. Joseba Irazokiri dagokionez, dagoeneko ez du aurkezpenik behar. Bere musika, berriz, ez dago aurkezterik: denetik egiten du eta ez dago esaterik larunbatean zer egingo duen. Gauza ziur bakarra, entzuleen gustukoa izango dela da.
Johnny Casino gitarra-jotzaile australiarrak ere ibilbide luzea du. Egun Alacanten bizi da eta bere azken diskoan kanta lasaiak aurkitu daitezke. Joao Tomba galiziarrari dagokionez, rock and rolla eta umore ona uztartzen ditu.
