Eguberrietako neurriak gogortu ditu Jaurlaritzak: seiko otorduak eta tabernak seirak arte
Gabon eta urtezahar gauetan 00:30era aurreratu dute etxeratze ordua, eta ostalaritzak eta komertzioek 18:00etarako itxi beharko dute.
LABI Euskadiko Babes Zibileko Planaren Aholku Batzordea gaur bildu da, abenduaren 10ean hartutako neurriak berrikusi eta Eguberriei begira zein erabaki hartu zehazteko. Egoerak ordutik hona okerrera egin duela baieztatu dute, eta hainbat neurri gogortzea erabaki dute. Hala, gabonetan eta urtezahar nahiz urteberri eguneko otorduetan gehienez ere sei lagun elkartu ahal izango dira mahaiaren bueltan -lehen 10 ziren-. Ordutegiak ere murriztu egin dituzte; ostalaritzak 18:00etan itxi beharko du, eta etxeratze ordua 00:30ean ezarri dute. Hauek dira gaur hartutako neurriak:
- Abenduaren 24tik 25erako eta abenduaren 31tik urtarrilaren 1erako gauean, zirkulazio-muga 00:30ean ezarriko da. Helburua da pertsonen bilkuretarako denbora eta mugikortasunerako ordutegiak ahalik eta gehien mugatzea.
- Euskal Autonomia Erkidegoko konfinamendu perimetrala 2020ko abenduaren 23tik 26ra eta 2020ko abenduaren 31tik 2021eko urtarrilaren 1era bitartean altxatuko da. Urte amaieraren inguruko murrizketak areagotu egin dira, ospakizun honen inguruko mugikortasuna ahal den neurrian saihesteko.
- Abenduaren 31tik urtarrilaren 1era bitartean, urteari agurra eta sarrera emateko bazkariak eta afariak egiteko familia-bilkurak sei lagunetik gorakoak ez izatera baldintzatuta egongo dira. Gabon-gauean hain murriztailea ez den eredu bat aplikatzen dugu, arrisku handiagoko gizarte- eta familia-interakzioak saihesteko.
- Abenduaren 24, 25, 31 eta urtarrilaren 1, 5 eta 6rako, mota guztietako merkataritza, ostalaritza- eta jatetxe-establezimenduak 18:00etan ixtea, farmazien, zerbitzuguneen eta gasolindegien kasuan izan ezik. Egun horietako azken orduko erosketetan pilaketak saihestu nahi ditugu, baita egun horietako azken orduetako tabernetako jende pilaketa tradizionalak ere.
- Abenduaren 25erako eta urtarrilaren 1erako eta 6rako zehaztea merkataritza- eta ostalaritza-establezimenduak ezin izango dira 09:00ak baino lehen ireki. Etxetako jaien balizko luzapena 06:00etako establezimenduen irekierarekin konektatzea saihesten saiatzen gara.
- 2020ko abenduaren 30etik 2021eko urtarrilaren 2ra bitartean, kanpinen kasuan, debekatuta egongo da abenduaren 28a baino lehen ostatu hartu ez duten bezeroak onartzea. Urte amaierako jaiak antolatzeko saiakerak antzeman dira, bungalowak eta kanpinekin lotutako beste zerbitzu batzuk alokatuz. Praktika hori prebenitzen saiatzen ari gara.
- Debekatuta dago 2020ko abenduaren 31ean eta 2021eko urtarrilaren 1, 5 eta 6an kotilioiak edo oturuntzak egitea hotel, landetxe, kanpin edo beste edozein establezimendutan, espazio komunetan, zein gela, bungalow edo apartamentuetan. Jatetxe-zerbitzua duten establezimenduetan, abenduaren 31n eta urtarrilaren 5ean, 20:00etatik aurrera, bertan ostatu hartu eta behar bezala erregistratuta dauden pertsonei soilik zerbitzatu ahal izango zaizkie afariak, eta 23:30ak baino lehen hustuko dira jantokiak. Bazkarietan eta afarietan ezingo da inolaz ere mahai bakoitzeko sei pertsona baino gehiago izan, eta edukierari, distantziari eta maskaren erabilerari buruzko gainerako prebentzio-neurriak errespetatu beharko dira.
Txertoak 27an
Bestalde, Gotzone Sagardui Osasun sailburuak jakinarazi du Pfizer eta BioNTech konpainiek garatutako txertoaren lehen dosiak abenduaren 27an iritsiko direla Euskal Autonomia Erkidegora eta egun horretan bertan hasiko dela txertaketa kanpaina.
