Mikra zirku ikuskizuna egin dute Idiazabalen
Gabonetako ekitaldien barruan, Mikra zirku ikuskizuna izan da gaur Idiazabalgo pilotalekuan
Mikra zirku ikuskizuneko kideak // A.Garmendia Barre algaraz bete da gaur Idiazabalgo Igarondo pilotalekua Mikra zirku ikuskizuneko kideei esker. Herritar asko izan dira zirkua, musika eta antzerkia uztartzen dituen ikuskizun honetan gaur arratsaldeko 17:30etan. Pilotalekua haur eta familiez goraino egon den arren, kutsatzea ekiditeko neurri guztiak bete dituzte bertan. Familiak ekitaldia hasi baino 15 minutu lehenago bertaratu behar izan dira era mailakatuan sartzeko, eta ikuskizunean zehar segurtasun distantziak eta musukoaren erabilera errespetatu dira uneoro.
Eguberri berezi zein ezberdin hauek gozatu ahal izateko asmoz, gaurko ikuskizunaz gain beste hainbat ekitaldi antolatu ditu Idiazabalgo Udalak. Abenduaren 28tik 29ra “Misterio Etxea” izeneko scape room bat antolatu dute 13 urtetik 99 urterako herritarrentzat. Urtarrilaren 3an Arrate Zubigaray organo-jotzaileak kontzertua eskainiko du elizan arratsaldeko 18:30etan. Urtarrilaren 4an “Tramankulu” jolas kooperatiboak antolatu dituzte pilotalekuan, eta ordutegia adinaren araberakoa izango da. Ekitaldi guzti hauek doan izango diren arren, erreserbak aurretik egin beharko dira.
Azkenik, urtarrilaren 5ean Errege Magoen bisita jasoko dute Idiazabalgo herrian, baina hau osasun arauen arabera zehaztuko da.
