Zaldibian ez dute hotzik pasako
Datozen egunetan hotza eta euria nagusi izango dira Goierrin. Zaldibian ekitaldi asko antolatu dituzte, hotzetik eta euritik salbu. Igandean Eneko Dorronsorok 'Agirre' diskoa aurkeztu zuen.
Neguan sartu gara eta datozen egunetan ez da giro izango Goierrin: egunero euria egingo du eta termometroa ez da hamarreko langara iritsiko. Zaldibian ez dut hotzik pasako eta ez dira bustiko, ordea. Izan ere, ekitaldi asko antolatu dituzte, hotzetik eta euritik salbu. Igandean Eneko Dorronsorok eta Fredi Pelaezek Agirre diskoa aurkeztu zuten eta gaur Lur obra antzeztuko dute.
Eneko Dorronsoro ataundarrak, Fredi Pelaez lazkaotarrarekin elkarlanean argitaratu du Agirre izeneko diskoa. Lazkaoko Liburu eta Disko Azokan aurkeztu zuen hilaren 20an eta pasa den asteburu honetan hiru kontzertu egin ditu: larunbatean Ataunen eta igandean Zaldibian. Azken herri honetan bi kontzertu egin zituen.
Amari omenaldia
Dorronsorok bere amaren abizena jarri dio diskoari, txikitatik eman dion laguntza eta babesa eskertzeko. Gaztetik gaur arte sortutako kantak bildu ditu bere lehen bilduma propioan. Diskoan nazioartean bizi izandako esperientziak ere jaso ditu. Horren adibide, diskoko azkan kanta, Town Ataun izenekoa. Hurrengo kontzertua urtarrilaren 3an egingo du, Legorretan: 19:00etan, Herri Antzokian.
Gustura ageri da Zaldibian izandako harrerarekin. « Bi emanaldi egin genituen jarraian eta bietarako sarrerak berehala agortu ziren. Gu oso gustura aritu ginen eta ikusleek ere gustura egon zirela esan ziguten».
Dorronsoro eta Pelaezen kontzertu akustikoaz gain, bestelako ekintza asko antolatu dituzte negu honetarako Zaldibian. Gaur Lur obra antzeztuko dute antzokian, Lehen Hezkuntzako 4.,5. eta 6. mailako ikasleentzat. Haur Hezkuntzako 3.,4. eta 5. mailako txikientzat, berriz, ludoteka antolatu dute biharko, goizeko 11:00etatik hasita. Ez da egun horretako ekitaldi bakarra: Lehen Hezkuntzako 1., 2. eta 3. mailakoek jolas tailerrak egingo dituzte. Arratsaldean, Lander Garrok 2 urte, 4 hilabete eta egun bat intsumisioari buruzko dokumentala aurkeztuko du.
Urte berriarekin bat, Erlauntza pelikula eskainiko dute urtarrilaren 2an. 4an, adin guztientzat prestatutako artzainen herri kirolak izango dira. Urtarrilaren 7an, adin ezberdinetarako umeentzat jolasak egongo dira.
