Teilatuetan pilatutako elurrarekin kontuz ibiltzeko eskatu du udalak
Hainbat gomendio helarazi dizkie herritarrei, eta arriskurik ikusiz gero udaltzainei jakinarazteko eskatu diete.
Azken egunetan botatako elurra ez da oraindik urtu Legazpin, eta eraikinetako teilatuek zuri jarraitzen dute. Teilatuetan pilatu den elur hori arriskutsua izan daitekeela eta, udalak hainbat gomendio helarazi dizkie legazpiarrei.
Hala, atarietara sartzean eta irtetean, eraikineko teilatu ertza nola dagoen begiratzeko esan die, eta elurra ikusiz gero, fatxadetatik ahalik eta urrunen ibiltzeko. Gainera, elurra espaloira erortzeko arriskua dagoela ikusiz gero, Udaltzaingoari deitzeko eskatu die: 092 edo 943 10 96 62 zenbakietara.
