Lehiaketen lehiaketako argazkiek Legazpin hasi dute Goierriko bira
Argizaiola erakusketa kultur etxean dago ikusgai hilaren 29ra arte. Ikatza argazkilari elkartearen ekimenez iritsi da Legazpira. Beasaingo Manu Barreirok aipamena jaso du tere madinabeitia
Argizaiola argazki erakusketa ibiltariak geldialdia egin du Legazpiko kultur etxean. Bertan ikusgai daude Euskal Herriko lehiaketen lehiaketa bezala ezagutzen den sariketaren 2020ko edizioko argazki irabazleak, eta parte hartutako argazkilariek aurkeztutako lanen hautaketa.
Legazpira Ikatza argazkilari elkartearen ekimenez iritsi da Argizaiola erakusketa, eta urtarrilaren 29ra arte egongo da ikusgai, astelehenetik ostiralera bitartean, 17:30etik 20:30era.
Manu Barreiro, saritua
Ikatzako kide den Julian Gil arduratu zen joan den ostiralean erakusketa aurkezteaz. Ikatzaren Legazpi Hiria lehiaketa da, hain zuzen, Euskal Herriko Argazkilari Taldeen elkarteak antolatzen duen Argizaiola Trofeora iristeko bideetako bat. Legazpikoan eta Euskal Herrian egiten diren beste hamahiru lehiaketatan sailkatutako lehen hiru argazkilariek bakarrik parte har dezakete Argizaiolan, eta horien artean daude Argizpi elkartearen Beasain Hiria-Igartza Saria eta Ordiziako Ortzadar elkartearen Nikolas Lekuona. Lehiaketa horietako 2019ko edizioetako argazkilari onenen lanak dira Argizaiola 2020 erakusketan jaso direnak, bere 40. edizioa osatuz.
Gilek egindako aurkezpenean aipamen berezia egin zuen Argizaiola 2020ko irabazleen lanen aurrean. Arkaitz Ruiz Iglesias da irabazlea, eta Iñigo Alzugarai eta Beasaingo Manu Barreiro aipamen banaren jabeak. Ikatzako kideen lanetan ere jarri zuen azpimarra, Legazpiko elkarteko hainbat argazkilaren irudiak ere jasotzen dituelako erakusketak: Xabi Mata, Pablo Perez Herrero, Miguel Angel Perez Herrero eta Carlos Mediavilla.
Lanen inguruan ere jardun zuen Gilek, eta gai, teknika, edizio mota eta estiloen askatasuna aipatu zituen, Argizaiola lehiaketaren oinarriek ez baitute mugarik jartzen alde horretatik, ezta kolorearen edo zuri-beltzaren erabileraren inguruan ere.
Argizaiola 40 aplikazioa
Legazpiko erakusketara joaterik ez duenak badu Euskal Herriko argazkilari afizionatu onenen lanak ikusteko beste modurik, mugikorrerako Argizaiola 40 aplikazioan. Interneten ere ikus daitezke: argizaiola.federacionfotovasca.org/.
