Rafa Ruedak irekiko du Sagarock! gastronomia musikatuaren zikloa
Ordiziarrock Ekintzak Taldearen ekimen berriena da Sagarock!, eta martxoaren 5ean hasiko da. Ordiziako Tximista sagardotegian egingo dute. Sarrerak salgai daude.
Sagardoa gehi rocka, emaitza da Sagarock!, Ordiziarock Ekintzak taldearen ekimen berriena, eta datorren martxoaren 5ean hasiko dena. Gastronomia musikatuaren zikloa deitu duten hau, Rafa Ruedaren kontzertuarekin irekiko dute, eta Ordiziako Tximista sagardotegiko sagardorekin bustiko dute ekimena. Sarrerak dagoeneko salgai daude, Ordiziarrocken webgunean.
Sarritan esandakoa errepikatzea da seguruenik, baina egia dena, egia da eta kitto!: Ordiziarrockeko lagunak buruari eragiten espezilistak dira, baita erronka berriei aurre egiten ere. Oraingo honetan, musika eta gastronomia uztartzen dituen ekimena dakarte. Osasun krisiagatik hain mugatua geratu den aisialdi eskaintza bat baino gehiago da; hain, zuzen, osasun krisiagatik kaltetuak izaten ari diren bi sektoreri bultzadatxoa ematera ere badatorrelako Sagarrock!. Esan daiteke, bertako produktua dela 100%ean.
Ekimen gastronomiko musikatu honetarako, aukera desberdinak daude, lau sarrera mota desberdin baitaude: Kontzertua bakarrik; Kontzertua gehi sagardo dastaketa; Kontzertua gehi sagardo dastaketa eta pintxoak; eta kontzertua gehi sagardotegiko menua. Ate irekiera, 18:00etan.
Sarrerak
Sagarock!-eko sarrerak salgai daude jada. Horretarako Ordiziarrock ekintzak taldearen webgunean sartu behar da. Bertan, sarrera mota desberdinak aurki daitezke eta nahi dena erosi.
Hurrengoak
Martxoaren 5ekoa baina, lauko ziklo baten lehena baino ez da izango. Hurrengoa, martxoaren 28an egingo dute. Igandea izango da, eta arratsaldean egin partez, eguerdian egitea aurrikusi dute. Egun horretan, Rüdiger entzuteko aukera izango da. Beste bi talde gehiago ere ekarriko ditu Sagarock! ekimenak: Jon Gurrutxaga eta Urbil Artola; eta Eneritz Furyak.
Bazkide kanpaina
Bestalde, bazkide kanpaina ere zabalik du Ordiziarrock Ekintzak Taldeak; «Asko eta asko dira, hutsik egin gabe, antolatzen ditugun ekintzetan parte hartzen dutenak, eta orain, gure proiektuaren parte izateko urrats bat gehiago eman dezakete».
Ordiziarrockeko bazkide izateak abantaila asko ditu: «Sarreretan deskontuak, musika taldeen materialaren zozketetan parte hartzea, ekintzen informazio osoa,…». Bazkide egiteko, sartu ordiziarrocken webgunean.
