Kirol jardunaldien zuzeneko emisioa egingo du Aupatv plataformak
Ordiziako Udalak eta Akhomedia enpresak hala hitzartuta, futbol, saskibaloi eta eskubaloi partidak ikusi ahalko dira. Martxoko programazioa prest dute dagoeneko
Ordiziako kirol taldeen partidak eta kirol jardunaldiak zuzenean ikusteko aukera zabaldu du Ordiziako Udalak Akhomedia ikus-entzunezko enpresarekin egin duen hitzarmenari esker. Hala, goi mailan lehiatzen ari diren Ordiziako taldeen jarraipena egin ahalko du interesa duen edonork. Partidak ikusteko bidea oso erraza da, Aupatv Interneteko plataforman sartu eta bertan ikusi ahalko dira. Zuzenekoaren ostean, Ordiziako Udalaren Youtubeko kanalean jarriko dira emititutako partida guztiak.
Ordiziako Udaleko kirol zinegotzia Jon Ander Caballerok zerbitzu berriaren aurkezpenean nabarmendu zuenez, «Ordiziako Udalak kirolaren alde egiten duen apustua tinkoa da, eta aurkeztu dugun proposamenak eskaintza zabaldu eta herritarrei bertako kirolarien kirol saioak jarraitzeko aukera emango die». Eta esan bezala, Aupatv Interneteko plataformaren bidez egin ahalko da. Aupatv euskal kirol txikiari eta ez-profesionalari hauspoa emateko online gunea da. Sorlekua Gipuzkoan du, eta momentuz Gipuzkoa mailan ari dira lanean, Ordizian besteak beste. Kirol-egitasmo eta jardunaldiak zuzenean emisioekin, zaleek beren kirola edonon eta edonola jarraitzeko aukera izango dute.
Oraingoz, futbol, eskubaloi eta saskibaloi partidak emango dituzte. Lehen emisioa, iragan martxoaren 6an, larunbatean egin zuten. Futboleko ohorezko erregional mailako Ordizia Kirol Elkarteak eta Zarautz Kirol Elkarteak Altamiran jokatuko partida jarraitu ahal izan zuten zaleek. Igandean, berriz, eskubaloiko senior neskek, Pulpo taldearen aurka Majorin jokatutakoa eman zuten.
Futbola, eskubaloia eta saskibaloia bai, baina ez horiek bakarik. Datorren ekainaren 19an egingo den atletismoko mitina eskainiko dute. Caballerok berak hala azaldu zuen: «Hauek izango dira oraingoz egingo diren zuzeneko erretransmisioak, baina beharren arabera joango gara egokitzen eta aztertzen ea beste zenbait kiroletako partidak ere eskaini ditzakegun zuzenean».
Hurrengoa
Hurrengo emanaldia, senior lehenengo nazional mailako saskibaloi partida izango da. Ordiziak, Getxo hartuko du larunbatean, 18:00etatik aurrera.
MARTXOAK 13
· 18:00. Saskibaloia. Seniorren lehen mailako partida: Ordizia-Getxo
MARTXOAK 20
· 16:00. Futbola. Ohorezko erregional mailako partida: Ordizia-Oiartzun
MARTXOAK 21
· 12:00. Eskubaloia. Seniorren lehen mailako partida: Ordizia Siglo XX – Soraluze BKE.
